وزبەكستان پرەزيدەنتى شاۆكات ميرزيوەۆتىڭ توراعالىعىمەن 27 ناۋرىزدا وتكەن كەڭەستە ەلدەگى اتوم ەنەرگەتيكاسىن دامىتۋ ماسەلەسى قارالدى. بۇل تۋرالى مەملەكەت باسشىسىنىڭ ءباسپاسوز قىزمەتى مالىمدەدى، دەپ حابارلايدى "ادىرنا" ۇلتتىق پورتالى.
جيىندا اتوم ەنەرگەتيكاسىنىڭ بولاشاقتا ەلدەگى نەگىزگى ەلەكتر ەنەرگيا كوزدەرىنىڭ ءبىرى بولاتىنى اتاپ ءوتىلدى. ساراپشىلاردىڭ بولجامىنا سايكەس، 2035 جىلعا قاراي وزبەكستانداعى ەلەكتر ەنەرگياسىن تۇتىنۋ 81,5 ملرد كۆتساعاتتان 121 ملرد كۆتساعاتقا دەيىن وسەدى. بۇل گەنەراتسيا كوزدەرىن ءارتاراپتاندىرۋ قاجەتتىلىگىن كورسەتەدى.
وزبەكستان بيلىگى 2030 جىلعا قاراي «جاسىل» ەنەرگەتيكانىڭ ۇلەسىن 50%-دان اسىرۋدى جوسپارلاپ وتىر، الايدا اتوم ەنەرگەتيكاسىن دا ۇزاق مەرزىمدى شەشىم رەتىندە قاراستىرۋدا.
كەڭەستە ءىرى اتوم ەلەكتر ستانتسياسىن (اەس) سالۋ ماسەلەسى جان-جاقتى قاراستىرىلىپ، تەحنيكالىق جانە ەكونوميكالىق اسپەكتىلەر تالقىلاندى.
بۇگىندە ەلدە شاعىن قۋاتتى اتوم ەلەكتر ستانتسياسى (اسمم) جوباسى ازىرلەنۋدە. سونىمەن قاتار، ءىرى اەس سالۋ بويىنشا كەلىسسوزدەر جۇرگىزىلىپ جاتىر.
2025-2027 جىلدارعا ارنالعان ماگاتە-مەن (حالىقارالىق اتوم ەنەرگەتيكا اگەنتتىگى) بىرلەسكەن ءىس-قيمىل جوسپارى ازىرلەندى. جوبالاۋ مەن پايدالانۋعا بەرۋ كەزەڭدەرى ماگاتە تاراپىنان حالىقارالىق قاۋىپسىزدىك ستاندارتتارىنا سايكەس باقىلانادى. قارجىلاندىرۋ كوزدەرى، تەحنيكالىق شەشىمدەر جانە قۇرىلىس الاڭدارى تالقىلانۋدا.
كەڭەسكە دەيىن وزبەكستانعا «روساتوم» مەملەكەتتىك كورپوراتسياسىنىڭ اتوم ەنەرگەتيكاسى جونىندەگى ءبىرىنشى ۆيتسە-پرەزيدەنتى، «اتومسترويەكسپورت» اق پرەزيدەنتى اندرەي پەتروۆ كەلگەن بولاتىن. ول «ۋزاتوم» اگەنتتىگىنىڭ باسشىسى ازيم احمەدحادجاەۆپەن بىرگە شاعىن جانە ءىرى اەس قۇرىلىسى بويىنشا كەلىسسوزدەر جۇرگىزدى.
27 مامىر 2024 جىلى وزبەكستان «روساتوممەن» شاعىن اتوم ستانتسياسىن جوبالاۋ، جابدىقتاۋ جانە سالۋ جونىندە كەلىسىمشارتقا قول قويدى. العاشقى شاعىن اتوم ستانتسياسى (اسمم) دجيزاك وبلىسىنىڭ فاريش اۋدانىنداعى تۋزكان كولىنىڭ ماڭىندا سالىنادى. مۇندا ارقايسىسى 55 مۆت بولاتىن التى رەاكتور ورناتىلادى، جالپى قۋاتى 330 مۆت قۇرايدى. قۇرىلىس 2026 جىلدىڭ ەكىنشى توقسانىندا باستالادى، ال العاشقى رەاكتور 2029 جىلى ىسكە قوسىلادى.
