رەسەي پرەزيدەنتى ۆلاديمير پۋتين اقش پرەزيدەنتى دونالد ترامپتىڭ بۋداپەشتتە ءوتۋى ءتيىس سامميتكە قاتىستى ءسوزىن ءتۇسىندىردى. ونىڭ ايتۋىنشا، بۇل كەزدەسۋ جويىلعان جوق، تەك كەيىنگە شەگەرىلدى. مالىمدەمە 23 قازان كۇنى ماسكەۋدە جاسالدى، دەپ حابارلايدى "ادىرنا" كرەملدىڭ رەسمي سايتىنا سىلتەپ.
ءپۋتيننىڭ ايتۋىنشا، اقش پرەزيدەنتى كەزدەسۋدى كەيىنگە قالدىرۋ تۋرالى ايتقان.
«ديالوگ ءاردايىم قاقتىعىستان دا، داۋدان دا، سوعىستان دا جاقسى. ءبىز ارقاشان كەلىسسوزدەر جالعاسقانىن قالاپ كەلدىك جانە قازىر دە قولدايمىز»، - دەدى ول.
سونداي-اق رەسەي باسشىسى:
«بۇل كەزدەسۋگە مەن دە، اقش پرەزيدەنتى دە جەڭىل قاراماۋىمىز كەرەك. كەزدەسۋدەن كۇتكەن ناتيجە شىقپاي قالسا، بۇل قاتەلىك بولار ەدى»، - دەپ اتاپ ءوتتى.
ونىڭ سوزىنشە، بۋداپەشت ءسامميتىن وتكىزۋ باستاماسىن اقش ۇسىنعان، ال وعان دەيىن مەملەكەتتىك حاتشى ماركو رۋبيو مەن رەسەي سىرتقى ىستەر ءمينيسترى سەرگەي لاۆروۆتىڭ كەزدەسۋى جوسپارلانعان.
پۋتين اقش ەنگىزگەن جاڭا سانكتسيالارعا دا پىكىر ءبىلدىردى. ول شەكتەۋلەردىڭ «ەلەۋلى سالدارى بولۋى مۇمكىن» ەكەنىن مويىنداعانىمەن، ولاردىڭ رەسەي ەكونوميكاسىنا ايتارلىقتاي اسەر ەتپەيتىنىنە سەنىمدى ەكەنىن ايتتى.
«بۇل – رەسەيگە قىسىم كورسەتۋ ارەكەتى. بىراق ءوزىن قۇرمەتتەيتىن ەشبىر مەملەكەت قىسىممەن شەشىم قابىلدامايدى»، — دەدى پۋتين.
سونداي-اق ول جاڭا سانكتسيالار ەكى ەل اراسىنداعى قاتىناستاردىڭ قايتا جاندانۋىنا كەدەرگى كەلتىرىپ وتىرعانىن ايتتى.
«اقش اكىمشىلىگىنىڭ مۇنداي قادامدارى رەسەي مەن امەريكا اراسىنداعى قارىم-قاتىناسقا زيان كەلتىرەدى»، - دەپ تۇيىندەدى رەسەي پرەزيدەنتى.
ەسكە سالايىق، 16 قازاندا پۋتين مەن ترامپ تەلەفون ارقىلى سويلەسىپ، ۋكرايناداعى جاعدايدى تالقىلاعان ەدى. كەيىننەن كوشباسشىلاردىڭ الداعى ەكى اپتا ىشىندە بۋداپەشتتە جەكە كەزدەسۋ وتكىزۋگە كەلىسىمگە كەلگەنىن ايتىلدى، الايدا ناقتى ۋاقىتى بەلگىلەنبەگەن بولاتىن. ال 17 قازاندا ترامپ اق ۇيدە زەلەنسكيمەن جولىققان ەدى.
بۋداپەشتەگى كەزدەسۋ بولا قالسا، زەلەنسكي وعان ءوزىنىڭ دە قاتىسا الاتىنىن مالىمدەگەن.
ال ەۋروپا ەلدەرى بۋداپەشتكە ءپۋتيننىڭ ۇشاعىن وتكىزبەيتىنىن جاريالاعان. ليتۆا ءتىپتى "پۋتينگە ەۋروپادا تەك گااگادا ورىن بارىن" جاريالاعان، حالىقارالىق قىلمىستىق سوتقا سىلتەپ. حالىقارالىق قىلمىستىق سوت پۋتين بارسا، سول ەلدەردى ونى ۇستاپ سوتقا تاپسىرۋعا مىندەتتەگەن. پۋتين تاياۋدا دۋشانبەگە ساپارلاعان كەزىندە حالىقارالىق قىلمىستىق سوت ءپۋتيندى ۇستاماعانى ءۇشىن تاجىكستاندى ايىپتاعان.
ودان كەيىن ترامپ جاقىن ارادا رەسەي باسشىسى ۆلاديمير پۋتينمەن كەزدەسپەيتىنىن ايتتى. بۇل تۋرالى اق ءۇي دە رەسمي راستاعان.
