بۇگىن جەتىسۋ وبلىسىندا وليمپيادا جۇلدەگەرلەرى مەن ەلىمىزدىڭ تانىمال سپورتشىلارى جاستارمەن كەزدەستى. بۇل كەزدەسۋ «بۇقارالىق سپورت - بولاشاق جەڭىستەردىڭ باستاۋى» سپورتتىق ءىس-شاراسىنىڭ اياسىندا وتكىزىلدى،دەپ حابارلايدى "ادىرنا" جەتىسۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.
اتاپ ايتقاندا، وسى كۇنى تالدىقورعانداعى «جاستار» سپورت سارايىنا وليمپيادا جۇلدىزدارى ەرماحان ىبرايىموۆ، ولگا شيشيگينا، يۋري مەلنيچەنكو، ەۆگەني ياروۆەنكو، سەرگەي كوتەنكو، ماۋلەن مامىروۆ، ۆلاديمير ۆوحميانين، ەل فۋتبولىنىڭ اتى اڭىزعا اينالعان قاقپاشىسى قۇرالبەك ورداباەۆ جانە باسقا دا سپورت ساڭلاقتارى كەلدى. بۇقارالىق سپورتتى ناسيحاتتاۋ، جاستاردىڭ سالاماتتى ءومىر سالتىن ۇستانۋعا جانە دەنە شىنىقتىرۋعا دەگەن قىزىعۋشىلىعىن وياتۋ ماقساتىندا ۇيىمداستىرىلعان كەزدەسۋگە وبلىستاعى بالالار جانە جاسوسپىرىمدەر سپورت مەكتەپتەرىنىڭ تاربيەلەنۋشىلەرى، جاتتىقتىرۋشىلارى، جالپى ءبىلىم بەرەتىن مەكتەپتەردىڭ سپورت ۇيىرمەلەرىنە قاتىساتىن وقۋشىلارى مەن اتا-انالار قاتىستى.
شارانىڭ اشىلۋىندا ءسوز سويلەگەن وبلىس اكىمى بەيبىت يساباەۆ قوناقتارعا جىلى تىلەگىن ءبىلدىرىپ، مەملەكەت باسشىسىنىڭ بۇقارالىق سپورتقا ماڭىز بەرۋ تۋرالى تاپسىرماسىنا سايكەس اتالمىش شارانىڭ وتكىزىلىپ وتىرعانىن جەتكىزدى.
- جەتىسۋدىڭ جاس سپورتشىلارى، سىزدەردىڭ الدارىڭىزدا وليمپيادا چەمپيوندارى وتىر. ءبىر كەزدەرى ولار دا سىزدەر سياقتى ۇلكەن ارمانعا ۇمتىلعان جاس بالا بولعان. بۇگىندە ءبىزدىڭ وليمپياداشىلاردىڭ ۇلگىسى سىزدەرگە مىقتى موتيۆاتسيا بولادى، ومىرلىك ونەگەسى مەن ەڭبەكقورلىق قاسيەتتەرى سىزدەردىڭ جۇرەكتەرىڭىزگە جىگەر مەن جالىن ۇيالاتادى دەپ سەنەمىن! – دەدى ب. يساباەۆ.
مۇنان سوڭ قوناقتار كەزەكپەن ءسوز الىپ، جاس سپورتشىلارعا اقىل-كەڭەستەرى مەن تىلەكتەرىن ءبىلدىردى. سپورتشىعا كەرەكتى باستى قاسيەتتەردى اتاپ، شارشاماي ەڭبەكتەنۋگە شاقىردى.
- بۇگىن وسى زالدا وتىرعان بالالاردىڭ ىشىنەن بالكىم 5-10 جىلدان كەيىن الەم چەمپيونى، وليمپيادا جۇلدەگەرى شىعۋى ابدەن مۇمكىن. ءبىز دە ۇلكەن جەڭىستى بالا كۇنىمىزدەن ارماندادىق. سەرىك قوناقباەۆ، ءشامىل سەرىكوۆتەردى تەلەديداردان كورىپ، سول كىسىلەرگە ەلىكتەپ وستىك. جاي ارمانداپ قويۋ از، ەڭ باستىسى تەر توگۋ كەرەك. بۇل جولدا ەڭ ۇلكەن قارسىلاس – ءوزىڭ. ءوزىن، ءوزىنىڭ جالقاۋلىعىن جەڭگەن ادام مىندەتتى تۇردە چەمپيون بولادى، - دەدى بوكستان سيدنەي وليمپياداسىنىڭ چەمپيونى ەرماحان ىبرايىموۆ.
ال ماسكەۋدەگى وليمپيادا ويىندارىنىڭ چەمپيونى، ۆاتەرپولشى سەرگەي كوتەنكو:
- بۇگىن سىزدەردىڭ الدارىڭىزدا سپورتتىڭ قاي تۇرىنەن بولسىن جەڭىستىڭ شىڭىنا شىققان ازاماتتار كەلىپ وتىر. قاي-قايسىسىنان دا ۇلگى الۋلارىڭىزعا بولادى. جالپى جۇرەگىڭ قالايتىن سپورتتىڭ تۇرىمەن اينالىسۋ كەرەك، سوندا ناتيجە شىعادى. قازىر تەگىن سەكتسيالار كوپ، سپورتپەن اينالىسۋعا بارلىق مۇمكىندىك جاسالعان. سوندىقتان مىقتى سپورتشى بولۋ ەڭ ءبىرىنشى وزدەرىڭە بايلانىستى. جەتىسۋ جەرى - بۇرىننان مىقتى سپورتشىلارىمەن تانىلعان ءوڭىر. الداعى ۋاقىتتا دا وسى ولكەدەن الەمدى مويىنداتاتىن چەمپيوندار شىعادى دەپ ويلايمىن، - دەدى ول.
بۇدان ءارى كەزدەسۋ جاسوسپىرىمدەردىڭ سپورتشىلارعا وزدەرىن قىزىقتىرعان ساۋالدارىن قويىپ، پىكىر الماسۋىمەن جالعاستى. سپورت جۇلدىزدارى بوكس قولعابى، فۋتبول دوبى سياقتى سپورتتىق قۇرالدارعا ءوز قولتاڭبالارىن قويىپ، بالالارمەن بىرگە ەستەلىك سۋرەتكە ءتۇستى.
بالالار دا بۇگىنگى شارادان العان اسەرى ەرەكشە ەكەنىن ايتادى.
- ءوزىم تالدىقورعانداعى №18 مەكتەپتە 6-سىنىپتا وقيمىن. ەكى جىلدان بەرى جۇزۋمەن اينالىسامىن، وعان قوسا ۇستەل تەننيسى ۇيىرمەسىنە بارىپ ءجۇرمىن. ماعان سپورتپەن اينالىسقان ۇنايدى. بۇگىن وليمپيادا چەمپيوندارى كەلەدى دەگەن سوڭ ولاردى جۇزبە-ءجۇز كورىپ، سپورتتاعى ءومىرى تۋرالى تىڭداۋعا كەلگەنمىن، كەلگەنىمە قاتتى قۋانىپ وتىرمىن. ول كىسىلەردىڭ جەڭىس جولىنداعى ءتۇرلى وقيعالارىن، جاتتىعۋداعى تاباندىلىقتارى تۋرالى اڭگىمەلەردى ءوز اۋىزدارىنان ەستىدىك. ەگەر بولاشاقتا سپورتشى بولۋدى تاڭداسام، وسى كىسىلەر سياقتى چەمپيون بولعىم كەلەدى، - دەيدى رامازان جۇمابەك.
اتاپ وتسەك، وبلىستىڭ اۋدان-قالالارىنداعى 23 سپورت مەكتەبىندە 23 مىڭنان استام تاربيەلەنۋشى سپورتتىڭ 61 تۇرىمەن شۇعىلدانادى. ال وڭىردە دەنە شىنىقتىرۋ جانە سپورتپەن اينالىساتىن ادامدار وبلىس حالقىنىڭ 42 % قۇرايدى. جالپى وسى جىلدىڭ باسىنان بەرى ءوڭىر سپورتشىلارى رەسپۋبليكالىق جانە حالىقارالىق دەڭگەيلى جارىستاردا 1 مىڭنان استام مەدال جەڭىپ العان.
