ساندۋعاش دۇيسەنوۆانى سوت سانكتسياسىمەن تەرگەپ-تەكسەرۋ اياسىندا ۆيدەوعا تۇسىرگەن ، دەپ حابارلايدى “ادىرنا” ءتىلشىسى.
جۋرناليست ساندۋعاش دۇيسەنوۆانى جالاڭاش كۇيىندە ۆيدەوعا ءتۇسىرىپ العانى تۋرالى بىرنەشە كۇن بۇرىن ارىپتەسى سامال قابىشەۆا جازعان بولاتىن. جەتىسۋ وبلىستىق ءىىد ءباسپاسوز قىزمەتى بۇل ارەكەتكە قاتىستى رەسمي حابارلاما جاريالادى.
«بۇقارالىق اقپارات قۇرالدارىندا جانە الەۋمەتتىك جەلىلەردە پوليتسيا قىزمەتكەرلەرىنىڭ زاڭسىز ارەكەتتەرى تۋرالى اقپارات تارالۋدا. وسىعان وراي، سوتقا دەيىنگى تەرگەپ-تەكسەرۋ اياسىندا 11 تامىزدا سوت سانكتسياسىمەن جەكە ءتىنتۋ جۇرگىزىلگەنىن تۇسىندىرەمىز»، - دەلىنگەن حابارلامادا.
پوليتسەيلەردىڭ سوزىنشە ساندۋعاش دۇيسەنوۆانى ءتىنتۋ بارىسىندا قىلمىستىق ءىس جۇرگىزۋ كودەكسىنىڭ تالاپتارىن قاتاڭ ساقتالعان ءارى تەرگەۋشى سوت-مەديتسينالىق ساراپشىنىڭ قاتىسۋىمەن جانە ەكى كۋاگەردىڭ (بارلىعى ءبىر جىنىستى) قاتىسۋىمەن جۇرگىزگەن.
«وسى تەرگەۋ ارەكەتىن جاساۋ كەزىندە عىلىمي-تەحنيكالىق قۇرالداردى (بەينەكامەرا) پايدالانۋ مىندەتتى جانە قىلمىستىق ءىس جۇرگىزۋ كودەكسىمەن رەتتەلەدى. جەكە ءتىنتۋ ناتيجەسىندە ازاماتشا د.-دان تىيىم سالىنعان زاتتار تابىلمادى»، - دەپ جازادى ءباسپاسوز قىزمەتى.
