قىرعىزستاننىڭ ماناس قالاسىنىڭ مەرى ەرنيسبەك ورموكوۆ تەلەارناعا بەرگەن سۇحباتىندا ۇلتتىق قاۋىپسىزدىك مەملەكەتتىك كوميتەتىنىڭ توراعاسىنا ءوزىن ۇرعانى ءۇشىن العىس ايتتى، دەپ حابارلايدى "ادىرنا" ۇلتتىق پورتالى.
بۇل اقپارات 24.kg اگەنتتىگىندە جاريالانعان.
قالا باسشىسى بۇل تۋرالى «كابار» اگەنتتىگىنە بەرگەن سۇحباتىندا تولىعىراق ايتىپ ءوتتى. ونىڭ سوزىنشە، داۋ 2 ميلليارد سوم قاراجاتتىڭ قالا دامۋىنا بولىنۋىنەن كەيىن تۋىنداعان. جەرگىلىكتى دەپۋتاتتار قارجىنىڭ يگەرىلۋىنە كۇمان كەلتىرگەن.
ء"بىز زاۋىت، اۋرۋحانا، IT-اكادەميا سالىپ، جولداردى جوندەپ، تەحنيكا ساتىپ الدىق. بىراق سول كەزدە دەپۋتاتتار سەنبەدى. كەيىن قامشىبەك تاشيەۆ ءبىزدى شاقىرىپ، ۇرىستى، ءتىپتى ۇرىپ جىبەردى. ءبىز رەنجىمەيمىز، كەرىسىنشە، ريزامىز. دەمەك، ءبىر جەردە قاتەلەسكەن شىعارمىز", – دەدى ەرنيسبەك ورموكوۆ.
شەنەۋنىك ورموكوۆ تاشيەۆتى «قاتال ءارى تالاپشىل باسشى» دەپ اتاپ، ونىڭ ادالدىعىن جوعارى باعالايتىنىن ايتتى.
