2026 جىلدىڭ ءبىرىنشى جارتىجىلدىعىندا ورتالىق ازيا ەلدەرىنىڭ ءبىر بولىگىندە تۋ كورسەتكىشى تومەندەدى، دەپ حابارلايدى "ادىرنا" ۇلتتىق پورتالى Anhor-عا سىلتەپ.
وزبەكستان مەن قازاقستاندا تىركەلگەن تۋ سانى ايتارلىقتاي ازايسا، تاجىكستان مەن قىرعىزستاندا كەرىسىنشە ازداپ ءوسىم بايقالعان.
2026 جىلدىڭ قاڭتار-ماۋسىم ايلارىندا ورتالىق ازيانىڭ ءتورت ەلىندە جالپى 711,3 مىڭ بالا دۇنيەگە كەلگەن. بۇل وتكەن جىلدىڭ سايكەس كەزەڭىمەن سالىستىرعاندا 5,5 پايىزعا از. سالىستىرۋعا كەلەتىن ستاتيستيكالىق دەرەكتەر بولماعاندىقتان، ەسەپكە تۇرىكمەنستان ەنگىزىلمەگەن.
تۋ سانىنىڭ ابسوليۋتتىك كورسەتكىش بويىنشا ەڭ كوپ تومەندەۋى وزبەكستاندا تىركەلدى. ەلدىڭ ۇلتتىق ستاتيستيكا كوميتەتىنىڭ مالىمەتىنشە، 2026 جىلدىڭ العاشقى التى ايىندا 373,4 مىڭ بالا دۇنيەگە كەلگەن. بىلتىر وسى كەزەڭدە بۇل كورسەتكىش 405,5 مىڭ بولعان. وسىلايشا، تۋ سانى 7,9 پايىزعا قىسقارعان.
قازاقستاندا دا وسىنداي ديناميكا بايقالدى. ۇلتتىق ستاتيستيكا بيۋروسىنىڭ دەرەگىنە سايكەس، 2026 جىلدىڭ ءبىرىنشى جارتىجىلدىعىندا ەلدە 149,8 مىڭ بالا تۋعان. 2025 جىلدىڭ سايكەس كەزەڭىندە بۇل كورسەتكىش 161,2 مىڭ بولعان. ناتيجەسىندە تۋ سانى شامامەن 7,1 پايىزعا تومەندەدى.
ال تاجىكستاندا كەرىسىنشە ءوسىم بايقالعان. 2026 جىلدىڭ قاڭتار-ماۋسىم ايلارىندا ەلدە 121,8 مىڭ بالا دۇنيەگە كەلگەن. بۇل وتكەن جىلدىڭ سايكەس كەزەڭىنەن 0,9 پايىزعا كوپ.
قىرعىزستاندا دا تۋ كورسەتكىشى وسكەن. العاشقى التى ايدا 66,3 مىڭ نارەستە تىركەلىپ، ءوسىم شامامەن 2 پايىزدى قۇرادى.
