پاكىستانداعى قازاقتاردىڭ جاعدايى كۇن وتكەن سايىن الاڭداتارلىق كۇيگە ءتۇسىپ وتىر. پاكىستان مەن اۋعانستان اراسىنداعى جاڭا شيەلەنىستەن كەيىن پوليتسيا بوسقىندارعا جاپپاي رەيد جۇرگىزە باستاعان. قازىرگى تاڭدا بۇل ەلدە ونداعان جىلدار بويى ءومىر ءسۇرىپ كەلە جاتقان ەتنيكالىق قازاقتار دا تۇتقىندالىپ جاتىر. بۇل تۋرالى Orda.kz جازدى، دەپ حابارلايدى «ادىرنا» ءتىلشىسى.
ءار اپتا سايىن ولاردىڭ ءبىرى ۇستالىپ، اۋعانستانعا دەپورتاتسيالانىپ جىبەرىلەدى. سولاردىڭ ءبىرى – يسلامۋددين لاتيفي. ول قاماۋدا وتىرسا دا، بولىپ جاتقان وقيعالار جايلى پاكىستاندىق جۋرناليستەرگە ايتىپ ۇلگەرگەن.
«اۋعانستاننان 45 جىل بۇرىن كەلگەنبىز. ءبىز – قازاقپىز. پاكىستاننىڭ ىشكى ىستەر مينيسترلىگى بىزگە ماسەلە شەشىلگەنشە تۇتقىندالۋدان قورعايتىن قۇجات بەرگەن. بىراق پوليتسيا ءبارىبىر ءبىزدى ۇستاپ الدى»، — دەيدى يسلامۋددين.
ەر ادام كارتوپ پەن پياز ساتىپ كۇنىن كورگەن. City21 تەلەارناسىنىڭ كادرلارىندا ونىڭ اكەسى ابدۋل لاتيف پەن باۋىرى سايفۋللا دا كورىنەدى. ولاردى بىرگە ۇستاعان.
ال كاراچي قالاسىنىڭ تۇرعىنى حاميد ۋللاح جوراباي پاكىستان بيلىگى بەرگەن قۇجاتتىڭ كۇشى جوق ەكەنىن ايتادى.
«قۇجاتتا ادامداردىڭ قازاق ەكەنى، ولاردىڭ مارتەبەسىن قازاقستان تەكسەرىپ جاتقانى جانە تەكسەرۋ اياقتالعانعا دەيىن پاكىستاندا تۇرۋعا رۇقسات بەرىلەتىنى جازىلعان»، — دەيدى وتانداسىمىز.
مينيسترلىكتەر مەن سىرتقى ىستەر مينيسترلىگىنىڭ وكىلدەرىنىڭ قولدارى قويىلعانىنا قاراماستان، بۇل قۇجات ادامداردى قورعاپ قالا الماعان. ودان بولەك، مۇنداي قۇجات الۋ وتە قيىن بولعان، سەبەبى قازاقستان ەلشىلىگى ەشقانداي رۇقسات بەرۋدەن باس تارتىپ، ناقتى جاۋاپ ۇسىنباعان.
«پوليتسيا ءيسلامۋدديننىڭ ۇيىنە باسا-كوكتەپ كىرىپ، ءۇش ادامدى بىردەن الىپ كەتتى. كەيىن تاعى ءبىر ەر ادام جوعالىپ كەتتى. ونىڭ قاي بولىمشەدە وتىرعانىن انىقتاۋ مۇمكىن بولمادى. ال اۋعانستانعا كۇشتەپ قايتارىلعان وتباسىلاردىڭ ءىزى دە تابىلماي كەتتى. ەشكىممەن بايلانىس جوق»، — دەيدى كۋاگەرلەر.
بۇل كەزدە ەكى ەلدىڭ شەكاراسىندا شايقاستار بولعان. «تاليبان» وكىلدەرى 58 پاكىستاندىق اسكەريدى جويىپ، 25 شەكارا بەكەتىن باسىپ العانىن مالىمدەگەن. وسى وقيعادان كەيىن پوليتسيا ۇيلەردى ءتىنتىپ، بوسقىنداردى ىزدەي باستاعان. ال حاميد ۋللاحتىڭ ءوزى قازىر دوسىنىڭ ۇيىندە تىعىلىپ جۇرگەنىن ايتادى.
رەسمي جاۋاپتاردىڭ ىشىنەن تەك 19 قىركۇيەكتە ءبىر حاتقا جاۋاپ كەلگەن. پاكىستانداعى قازاقستان ەلشىسى ەرجان قىستافين بۇل جاۋاپتى دەپۋتاتتىققا كانديدات، تاريحشى ءشامشى جۇمامۇراتتىڭ حاتىنا بەرگەن.
حاتتا ەلشىلىك كاراچي، كۆەتتا جانە پەشاۆار قالالارىنداعى 300 قازاقتىڭ ءوتىنىشى بويىنشا «جۇمىس جۇرگىزىلگەنىن» جانە ولاردىڭ ىستەرى «2025 جىلدىڭ جەلتوقسانىندا قارالاتىن» بولىپ جولدانعانىن جازعان.
«مەن تامىز ايىندا مينيستر نۇرتىلەۋگە (بۇرىنعى — رەد.) ءوز ازاماتتارىمىزدى قايتارۋ تۋرالى ءوتىنىش جازدىم. جاۋاپ 4 قازاندا كەلدى. بىراق حاتتى ءتۇسىنۋ مۇمكىن ەمەس. «جەلتوقساندا جۇمىس ورىندالدى»دەپ جازىلعان. ال قازىر قازان ايى عوي. ولار قاي اي ەكەنىن بىلە مە ءوزى؟ مەنىڭشە، قىستافين قازاق ءتىلىن تۇسىنبەيدى»، — دەپ اشۋلاندى ءشامشى جۇمامۇرات.
پاكىستانداعى قازاقتاردىڭ بۇل ماسەلەسى بىرنەشە جىلدان بەرى شەشىلمەي كەلەدى. ەلشىلىك پەن سىرتقى ىستەر مينيسترلىگى «ماسەلەنى قاراستىرامىز» دەپ ۋادە بەرگەنىمەن، وسى ۋاقىتقا دەيىن ناقتى ءىس اتقارىلماعان. ادامدار وتانىنان كومەك بولارىنا دەگەن ءۇمىتىن جوعالتا باستادى. ال تۇرمەدە وتىرعان قازاقتار وزدەرىن ءالى دە تۋعان ەلى سانايتىن قازاقستاننىڭ ولاردى ەسكە الاتىن كۇنىن كۇتىپ وتىر.
