باتىس قازاقستان وبلىسىندا كيىك سانىن رەتتەۋ جۇمىسى رەسمي تۇردە باستالدى. بۇل تۋرالى وبلىس اكىمدىگى مالىمدەدى، دەپ حابارلايدى “ادىرنا”.
اقپاراتقا سايكەس، كيىكتەردى اۋلاۋ جۇمىستارى 30 قاراشاعا دەيىن جالعاسادى. وسى جۇمىسقا 40-قا جۋىق مامان تارتىلىپ، 4 ارنايى بريگادا جاساقتالعان. ءار بريگادا 3 تەحنيكامەن قامتاماسىز ەتىلگەن، جالپى سانى 12 تەحنيكا جۇمىلدىرىلىپ وتىر.
«اۋلانعان كيىك ەتى ارنايى بەلگىلەنگەن ەت وڭدەۋ كاسىپورىندارىنا جەتكىزىلەدى. اتاپ ايتقاندا، بۇل ونىمدەردى «كۋبلەي» جشس، «جەڭىس» جك، «باتىس-نىق» جشس جانە «حايروۆ» جك قابىلدايدى. بولاشاقتا تاعى باسقا ەت كومبيناتتارىنىڭ دا بۇل ىسكە اتسالىسۋى جوسپارلانىپ وتىر»، - دەدى بقو ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى نۇرلان راحىمجانوۆ.
2025 جىلى جۇرگىزىلگەن اۆياتسيالىق ەسەپ ناتيجەسىندە باتىس قازاقستان وبلىسى اۋماعىندا كيىكتەردىڭ جالپى سانى 2,3 ملن باسقا جەتكەنى انىقتالعان. عالىمدار ازىرلەگەن بيولوگيالىق نەگىزدەمەگە سايكەس، پوپۋلياتسياعا زالال كەلتىرمەي، ونىڭ تەك 20 پايىزىنا، ياعني 460 مىڭعا دەيىن عانا رەتتەۋ جۇرگىزۋگە بولادى. ياعني بۇل – عىلىمي-زەرتتەۋلەر مەن تابيعي تەپە-تەڭدىكتى ساقتاۋ تالاپتارىنا نەگىزدەلگەن شەكتەۋ، دەيدى اكىمدىك.
مامانداردىڭ ايتۋىنشا، كيىك پوپۋلياتسياسىنىڭ باقىلاۋسىز كوبەيۋى اۋىل شارۋاشىلىعى جەرلەرىنە ەلەۋلى زيان كەلتىرىپ، ەكوجۇيەدە تەڭگەرىمسىزدىككە اكەلۋى مۇمكىن. سوندىقتان كيىك سانىن رەتتەۋ جۇمىسى ۇكىمەتتىڭ ءتيىستى قاۋلىسىنا سايكەس، بارلىق زاڭنامالىق جانە ەكولوگيالىق نورماعا ساي جۇزەگە اسادى.
