يندونەزيانىڭ سيدواردجو قالاسىندا ورنالاسقان «ال-حوزيني» مەكتەپ-ينتەرناتىنىڭ عيماراتى قيراپ، قازا تاپقاندار سانى 14 ادامعا جەتتى، دەپ حابارلايدى "ادىرنا" ۇلتتىق پورتالى.
South China Morning Post باسىلىمىنىڭ جازۋىنشا قۇتقارۋ جۇمىستارى بىرنەشە كۇننەن بەرى جالعاسىپ جاتىر. اۋىر تەحنيكا قولدانىلماعاندىقتان، ىزدەستىرۋ قولمەن جۇرگىزىلۋدە. الدىن الا مالىمەت بويىنشا، ونداعان ادام ءالى دە ءۇيىندى استىندا قالۋى مۇمكىن. 4 قازانعا دەيىن 103 ادام قۇتقارىلعان.
العاشقى تەرگەۋ ناتيجەسى عيماراتتىڭ ساپاسىز سالىنعانىن انىقتادى. تىرەۋىش باعاندار ءتورتىنشى قاباتتىڭ قوسىلۋىنان كەيىن اۋىرلىققا شىداماي قۇلاعان.
قايعىلى وقيعا 30 قىركۇيەكتە ياۆا ارالىنىڭ شىعىسىنداعى يسلامدىق مەكتەپ-ينتەرناتتا بولعان. ءىز-ءتۇزسىز كەتكەندەردىڭ باسىم بولىگى 7–11-سىنىپتا وقيتىن، جاسى 12 مەن 17 جاس ارالىعىنداعى ۇل بالالار ەكەنى بەلگىلى بولدى.
ءۇيىندى استىندا ءالى دە بالالار بولۋى مۇمكىن. قازا بولعانداردىڭ تۋىستارى دا ىزدەۋ جۇمىستارىنا قاتىسۋعا نيەت بىلدىرگەن.
اپاتتان ءۇش كۇن وتكەن سوڭ ءتىرى قالعاندارعا قاتىستى ەشقانداي بەلگى بايقالماعانىمەن، تۋىستارى 59 بالانىڭ ءتىرى تابىلاتىنىنا ءالى دە ۇمىتتەنىپ وتىر.
