2025 جىلدىڭ 1 قازانىندا ماروككونىڭ وڭتۇستىك-باتىسىنداعى اگادير قالاسىنىڭ ماڭىندا جاستاردىڭ جاپپاي نارازىلىعى تارتىپسىزدىككە ۇلاسىپ، سالدارىنان 3 ادام قازا تاۋىپ، جۇزدەگەن ادام جاراقات الدى جانە 400-دەن استام ادام قامالدى، دەپ حابارلايدى "ادىرنا".
رەسمي مالىمەتكە سايكەس، جاندارمەريا قىزمەتكەرلەرى قارۋ-جاراقتى تارتىپ الماق بولعان ءبىر توپ ادامعا وق اتۋعا ءماجبۇر بولعان. ناتيجەسىندە ءۇش ادام قازا تاۋىپ، ونداعان ازامات پەن قاۋىپسىزدىك قىزمەتكەرلەرى جارالانعان. ماروككو ىشكى ىستەر مينيسترلىگى جاريالاعان دەرەكتەر بويىنشا، ءبىر ءتۇننىڭ ىشىندە 354 ادام جارالانىپ، ولاردىڭ 326-سى - قاۋىپسىزدىك ورگاندارىنىڭ قىزمەتكەرلەرى.
ەلدىڭ 23 ايماعىنداعى 271 قىزمەتتىك پوليتسيا كولىگى، 175 جەكە اۆتوكولىك، 80-گە جۋىق اكىمشىلىك جانە كوممەرتسيالىق عيمارات زاقىمدانعان.
مينيسترلىك مالىمەتىنشە، تارتىپسىزدىككە قاتىسقانداردىڭ 70%-ى كامەلەتكە تولماعاندار، كەيبىر جاعدايلاردا بۇل كورسەتكىش 100%-عا دەيىن جەتكەن. قازىرگى تاڭدا 400-دەن استام ادام ۇستالدى. كامەلەتكە تولماعاندارعا قاتىستى پروتسەسسۋالدىق باقىلاۋ جۇرگىزىلىپ جاتسا، ەرەسەكتەردىڭ باسىم بولىگى قاماۋعا الىنعان.
ماروككو كورولدىگىندە قۇقىق قورعاۋ ورگاندارىمەن قاقتىعىسقا ۇلاسقان نارازىلىق شارالارى ءبىر اپتادان بەرى جالعاسىپ جاتىر. نارازىلىق شارالارى ەلدىڭ ەڭ ءىرى قالالارىندا، سونىڭ ىشىندە رابات، كاسابلانكا، تانجەر، مارراكەش جانە اگاديردە ءوتىپ جاتىر. جاستار كولىكتەردى ورتەپ، بانكتەرگە، دۇكەندەرگە، ۇكىمەتتىك عيماراتتارعا شابۋىل جاساپ، پوليتسيا بەكەتتەرىن قيراتتى.
نارازىلىق تولقىنىن TikTok, Instagram جانە Discord سياقتى الەۋمەتتىك مەديا پلاتفورمالارىندا پايدا بولعان «GenZ 212» دەپ اتالاتىن ءانونيمدى جاستار توبى ۇيىمداستىردى. بەلسەندىلەردىڭ ايتۋىنشا، ولاردىڭ تالابى دەنساۋلىق ساقتاۋ مەن ءبىلىم بەرۋ سالاسىنداعى رەفورمالارعا، سونداي-اق جەمقورلىقپەن كۇرەسكە قاتىستى.
"بىزدە ستاديوندار بار، اۋرۋحانالار قايدا؟" - دەيدى دەمونسترانتتار 2026 جىلعى افريكا كۋبوگى مەن 2030 جىلعى الەم چەمپيوناتىنا دايىندىققا ميللياردتاعان قاراجات سالاتىن بيلىككە نارازىلىق ءبىلدىرىپ.
ءىىم نارازىلىق ءبىلدىرۋ قۇقىعى زاڭ اياسىندا ساقتالاتىنىن، الايدا قۇقىقتىق ءتارتىپ كۇشتەرى «ازاماتتار مەن ينفراقۇرىلىم وبەكتىلەرىنىڭ قاۋىپسىزدىگىنە تونەتىن قاتەرگە جول بەرمەيتىنىن» اتاپ ءوتتى.
ساراپشىلاردىڭ پىكىرىنشە، نارازىلىققا دەنساۋلىق ساقتاۋ جۇيەسىنىڭ السىزدىگى، جاستار اراسىنداعى جۇمىسسىزدىق (رەسمي دەرەكتەر بويىنشا 35%-عا دەيىن), الەۋمەتتىك تەڭسىزدىك جانە الەۋمەتتىك قىزمەتتەرگە ينۆەستيتسيا سالۋدىڭ ورنىنا سپورتتىق جوبالارعا قارجى جۇمساۋعا كوڭىلى تولماۋ سياقتى فاكتورلار اسەر ەتكەن.
تارتىپسىزدىكتىڭ ەڭ كۇشتى ەپيزودتارى سۋسس-ماسسا ايماعىنىڭ ورتالىق قالاسى اگاديردە جانە ونىڭ ماڭىنداعى اۋدانداردا تىركەلدى.
