قاتەلىك سالدارىنان. ونداعان تۇتقىن تۇرمەدەن زاڭسىز بوساتىلعان

ۇلىبريتانيادا 37 تۇتقىن زاڭسىز بوساتىلعان، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.

باتىس ەۋروپا بويىنشا تۇتقىنى ەڭ كوپ ەلدە ورىن تاپشىلىعى بويىنشا ارنايى باعدارلاما اياسىندا بىرنەشە تۇتقىن مەرزىمىنەن ەرتە بوسايدى.

اسىرەسە، انگليا مەن ۋەلستەگى تۇرمەلەردە ورىن تاپشىلىعىنا بايلانىستى قابىلدانعان مەرزىمىنەن بۇرىن بوساتۋ باعدارلاماسى ەل ىشىندە ۇلكەن داۋعا اينالدى. سەبەبى جاڭا جۇيە اياسىندا ونداعان سوتتالۋشى زاڭسىز تۇردە بوستاندىققا شىققان.

قىركۇيەك ايىنان بەرى بۇل باعدارلاما بويىنشا شامامەن 1750 ادام تۇرمەدەن بوساتىلعان. بۇعان دەيىن سوتتالعاندار جازاسىنىڭ كەمىندە جارتىسىن وتەگەن سوڭ عانا بوستاندىققا شىعاتىن بولسا، جاڭا تارتىپكە ساي ولارعا جازانىڭ 40%-ىن وتەۋ جەتكىلىكتى. دەگەنمەن تاجىريبە بارىسىندا قاتەلىكتەرگە جول بەرىلىپ، 37 تۇتقىن زاڭسىز بوساتىلعانى انىقتالدى. ولاردىڭ باسىم بولىگى قايتا ۇستالىپ، تۇرمەگە قايتارىلدى، بىراق بەسەۋى ءالى ەركىندىكتە ءجۇر. ودان بولەك، بوستاندىققا شىققانداردىڭ ءبىرى سەكسۋالدىق سيپاتتاعى قىلمىسقا قايتا بارىپ، ۇستالعان.

World Prison Brief دەرەگىنشە، وتكەن جىلى ۇلىبريتانيا تۇرمەلەرىندە 97 مىڭنان استام ادام وتىرعان. بۇل كورسەتكىش فرانتسيادان 22%-عا، يتاليادان 37%-عا، گەرمانيادان 42%-عا كوپ. ال يسپانيامەن سالىستىرعاندا ەكى ەسەدەن اسادى.