قاراعاندى وبلىسى «تازا قازاقستان – بولاشاق ءۇشىن» رەسپۋبليكالىق ەكولوگيالىق اكتسياسىنا قوسىلدى. اۋقىمدى ءىس-شارا قازاقستان رەسپۋبليكاسى كاسىپوداقتار فەدەراتسياسىنىڭ باستاماسىمەن ەل كولەمىندە وتكىزىلدى.
ول كاسىپوداق قوزعالىسىنىڭ 120 جىلدىعى مەن فەدەراتسيانىڭ قۇرىلعانىنا 35 جىل تولۋىنا وراي ۇيىمداستىرىلدى.
قاراعاندى وبلىسىنىڭ قالالارى مەن اۋداندارىندا فەدەراتسيا قۇرامىنداعى 15 سالالىق جانە جەرگىلىكتى كاسىپوداق ۇيىمدارىنىڭ ەڭبەك ۇجىمدارى اۋلالاردى، ساياباقتاردى، قوعامدىق ورىنداردى تازالاپ، كوگالداندىرۋ جۇمىستارىمەن اينالىستى.
– نەگىزگى ماقسات – ەكولوگيالىق جاعدايدى جاقسارتۋ، اۋماقتاردى اباتتاندىرۋ جانە تابيعاتقا ۇقىپتى قاراۋ مادەنيەتىن قالىپتاستىرۋ، – دەدى قر كاسىپوداقتار فەدەراتسياسىنىڭ «قاراعاندى وبلىسىنىڭ كاسىپوداق ورتالىعى» اۋماقتىق بىرلەستىگىنىڭ توراعاسى بولات جۇمابەكوۆ. – بۇگىن ءبىز كاسىپوداقتار تەك قانا جۇمىسكەرلەردىڭ قۇقىقتارىن قورعاۋعا ەمەس، ەلدىڭ الەۋمەتتىك يگىلىگىنە دە ۇلەس قوساتىنىن اتاپ وتكىمىز كەلدى.
قاراعاندىداعى ەكواكتسيانىڭ نەگىزگى الاڭى ەڭبەك گيگيەناسى جانە كاسىبي اۋرۋلار ۇلتتىق ورتالىعى بولدى. مۇندا 80-نەن استام ادام 1,7 گەكتار اۋماقتا تازالىق جۇمىستارىن جۇرگىزدى. ءدال وسى ورتالىققا رەسپۋبليكالىق مارتەبە كاسىپوداقتار فەدەراتسياسىنىڭ باستاماسىمەن قايتارىلعان بولاتىن. ەكواكتسياعا وڭىردەگى كاسىپوداق بەلسەندىلەرى مەن ورتالىقتىڭ ەڭبەك ۇجىمى قاتىستى.
