قازاقشا ساپالى اۋدارمالارىمەن تانىمال Mazmundama باسپاسى «مەلومان» دۇكەندەر جەلىسىنەن قىسىم كورىپ وتىرعانىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى باسپا جەتەكشىسى شىڭعىس مۇقان الەۋمەتتىك جەلىدە حابارلادى.
Mazmundama باسپاسى بىرنەشە جىل بويى الەم ادەبيەتىنىڭ ۇزدىك تۋىندىلارىن قازاق تىلىنە اۋدارىپ، وقىرمانعا جاڭا ديزايندا ۇسىنىپ جۇرگەن باسپالاردىڭ ءبىرى.
باسپا باسشىسىنىڭ ايتۋىنشا، بۇعان دەيىن كىتاپتار «مەلومان» دۇكەندەرىنە قارىزعا بەرىلىپ، تۇسكەن قاراجاتتان تيپوگرافيا شىعىندارى وتەلىپ، قىزمەتكەرلەردىڭ ەڭبەكاقىسى تولەنىپ كەلگەن.
الايدا سوڭعى ءۇش ايدا «مەلومان» قارجىلىق مىندەتتەمەلەرىن ورىنداماي، تولەمدى توقتاتقان. وسىعان بايلانىستى باسپا اسا قيىن جاعدايدا قالعان. شىڭعىس مۇقان الەۋمەتتىك جەلىدە ماسەلە كوتەرىپ، قارىزدى قايتارۋدى تالاپ ەتكەننەن كەيىن عانا دۇكەن تاراپىنان بەرەشەك تولىق وتەلىپتى.
دەگەنمەن، كوپ ۇزاماي «مەلومان» باسپامەن اراداعى كەلىسىمشارتتى ۇزەتىنى تۋرالى تەك ورىس تىلىندە جازىلعان حات جولداعان. باسپا جەتەكشىسى مۇنى مەملەكەتتىك تىلگە دەگەن نەمقۇرايدىلىق ءارى سەرىكتەستەرىنە قىسىم دەپ باعالادى.
«مەلومان» سەكىلدى دۇكەندەر ءبىز سياقتى باسپالاردىڭ كوز مايىن تاۋىسىپ شىعارعان كىتابىن قارىزعا الىپ-ساتىپ پايدا تابادى. اقشاسىن ۋاقىتىندا قايتارمايدى. تالاپ ەتسەڭ، سەرىكتەستىكتى بۇزا سالادى. ءبىز مۇنداي جاعدايعا توزە المايمىز. ءبىزدىڭ كىتاپتاردى ەندى Kaspi ارقىلى الدەقايدا ءتيىمدى باعامەن الۋعا بولادى»، – دەدى شىڭعىس مۇقان.
