ەلىمىزدە 4 قازاننان باستاپ قوعامدىق ورىندارداعى ينتەرنەتكە قوسىلۋ ەرەجەلەرى وزگەرەدى، دەپ حابارلايدى "ادىرنا" ۇلتتىق پورتالى.
بۇل وزگەرىستەر بايلانىس قىزمەتتەرىن كورسەتۋ قاعيدالارىنا ەنگىزىلىپ وتىر.
تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى 17 قىركۇيەك كۇنى ءتيىستى بۇيرىققا قول قويعان. قۇجاتتا ينتەرنەتكە قوسىلۋ كەزىندە پايدالانۋشىلاردى مىندەتتى تۇردە سايكەستەندىرۋ تالاپتارى ناقتىلانعان.
قوعامدىق ورىنداردا Wi-Fi ارقىلى ينتەرنەتتى پايدالانۋ ءۇشىن ازاماتتار SMS نە eGov ارقىلى تىركەۋدەن وتە الادى.
پايدالانۋشى ارنايى فورماعا ءوز تەلەفون ءنومىرىن ەنگىزەدى. وسىدان كەيىن ءبىر رەتتىك قۇپياسوز SMS ارقىلى كەلەدى. قۇپياسوزدى ەنگىزگەن سوڭ عانا ينتەرنەتكە قوسىلۋعا رۇقسات بەرىلەدى. ال اۆتوريزاتسيا «ەلەكتروندىق ۇكىمەت» ۆەب-پورتالىنداعى ەلەكتروندىق تسيفرلىق قولتاڭبا (ەتسق) كومەگىمەن جۇزەگە اسادى.
قوعامدىق Wi-Fi جەلىسىن ۇسىنۋشىلار مەن بايلانىس وپەراتورلارى پايدالانۋشىنى ينتەرنەتكە تەك وسى ەكى ءادىستىڭ ءبىرى ارقىلى تىركەلگەن سوڭ عانا قوسۋعا مىندەتتى. بۇل تالاپ ءاربىر ينتەرنەتكە قوسىلعان ادامنىڭ ناقتى سايكەستەندىرىلۋىن قامتاماسىز ەتەدى.
مينيسترلىكتىڭ تۇسىندىرۋىنشە، جاڭا ەرەجەلەر قوعامدىق ينتەرنەتتى پايدالانۋداعى اشىقتىق پەن قاۋىپسىزدىكتى ارتتىرۋعا كومەكتەسەدى.
جالپى، جاڭا ەرەجە قولدانىلا باستايتىن 4 قازان عارىشتى يگەرۋ ءداۋىرىنىڭ باستالعان كۇنى دەپ ەسەپتەلەدى. 1957 جىلى وسى كۇنى بايقوڭىر عارىش ايلاعىنان عالامشار تاريحىندا العاش رەت جەردىڭ جاساندى سەرىگى ۇشىرىلعان ەدى.
