سينگاپۋردا ءوتىپ جاتقان پارا جۇزۋدەن الەم چەمپيوناتىندا نۇرداۋلەت جۇماعالي براسس ادىسىمەن 100 مەتر قاشىقتىقتى 1:06.64 سەكۋندتا ءجۇزىپ ءوتىپ، كۇمىس جۇلدەگە يە بولدى، دەپ حابارلايدى «ادىرنا» ءتىلشىسى تۋريزم جانە سپورت مينيسترلىگىنە سىلتەمە جاساپ.
ءبىرىنشى ورىندى بەيتاراپ ەلدىڭ سپورتشىسى تيموفەي گۋك 1:06.51 ۋاقىتىمەن يەلەنسە، ءۇشىنشى ورىنعا 1:06.99 سەكۋند ناتيجەسىمەن ۋكراينالىق الەكسەي فەدينا جايعاستى.
ايتا كەتەيىك، بۇل نۇرداۋلەتتىڭ الەم بىرىنشىلىكتەرىندەگى ءۇشىنشى كۇمىس جۇلدەسى. بۇعان دەيىن ول 2022 جىلى مادەيرادا جانە 2023 جىلى مانچەستەردە جۇلدەگەر اتانعان بولاتىن.
پارا جۇزۋدەن الەم چەمپيوناتى 21–27 قىركۇيەك ارالىعىندا ءوتىپ، بايراقتى باسەكەدە 75 مەملەكەتتەن 600-گە جۋىق سپورتشى قاتىسىپ جاتىر. قازاقستان اتىنان 7 سپورتشى باق سىناۋدا. سينگاپۋردا ءوتىپ جاتقان بۇل تۋرنير لوس-اندجەلەس 2028 پاراليمپيادا ويىندارىنىڭ الدىنداعى جاڭا پاراليمپيادالىق تسيكلدىڭ العاشقى ءىرى جارىسى بولىپ سانالادى.
بۇگىندە ەلىمىزدە 19 پاراليمپيادالىق سپورت ءتۇرى بەلسەندى دامىپ، جىل سايىن 800-دەن استام ءىس-شارا ۇيىمداستىرىلادى.
