قاراعاندى وبلىسىندا دۇنيەجۇزىلىك تازالىق كۇنىنە وراي وتكەن ەكولوگيالىق اكتسياعا 17 مىڭنان استام تۇرعىن اتسالىستى.
ناتيجەسىندە 20 مىڭ توننادان استام قوقىس جينالىپ، ونىڭ باسىم بولىگى قايتا وڭدەۋگە جىبەرىلدى. سەنبىلىكتەر ءوڭىردىڭ بارلىق قالالارى مەن اۋداندارىندا ۇيىمداستىرىلدى.
قازتۇتىنۋوداعى قاراعاندى ۋنيۆەرسيتەتىنىڭ ستۋدەنتتەرى دە باستامانى بەلسەندى قولدادى. ولار وقۋ ورنىنا جاقىن جاسىل بەلدەۋدى تازارتتى.
قاتىسۋشىلار بىرنەشە توپقا ءبولىنىپ، قوقىستى بولشەكتەپ جينادى: پلاستيك، شىنى جانە قايتا وڭدەۋگە جاتپايتىن قالدىقتار. ۇيىمداستىرۋشىلاردىڭ پىكىرىنشە، مۇنداي تاجىريبە جاستاردىڭ تۇرمىستىق قالدىقتارعا جاۋاپكەرشىلىكپەن قاراۋ مادەنيەتىن قالىپتاستىرادى.
— اكتسيا اياسىندا رۇقساتسىز قوقىس ورىندارىن جويۋ، ساياباقتار مەن دەمالىس ايماقتارىن تازالاۋ جۇرگىزىلۋدە. قۋانتاتىنى، ەرىكتىلەر قاتارى جىلدان-جىلعا ارتىپ كەلەدى. بۇل — ەكولوگيالىق ماسەلەلەردى شەشۋگە قوعامنىڭ شىنايى بەيىلدىلىگىنىڭ كورسەتكىشى، — دەپ اتاپ ءوتتى قاراعاندى وبلىسى ەكولوگيا دەپارتامەنتى ءبولىمىنىڭ مىندەتىن اتقارۋشى تەمىرلان تولەۋتاي.
ۋنيۆەرسيتەت باسشىلىعىنىڭ ايتۋىنشا، ەكولوگيالىق تاربيە ستۋدەنتتەرمەن جۇمىستىڭ اجىراماس بولىگى.
— ءبىز الەۋمەتتىك جۇمىس فاكۋلتەتىندە وقيمىز، دەگەنمەن ەكولوگيا ماسەلەلەرى دە ءبىز ءۇشىن وزەكتى. بۇگىن قالا تۇرعىندارىمەن بىرگە سەنبىلىككە قاتىسىپ، قاراعاندىنى تازا ءارى كورىكتى ەتۋگە ۇلەس قوستىق، — دەيدى ستۋدەنت جانسايا قازبەكوۆا.
تازالىق كۇنىنە ارنالعان سەنبىلىك قارقارالى ۇلتتىق تابيعي پاركىندە دە ءوتتى. مۇندا جاستار ورماندى القاپتى قوقىستان تازارتتى.
«تازا قازاقستان» اكتسياسى مەن دۇنيەجۇزىلىك تازالىق كۇنى اياسىندا وتكەن ەكولوگيالىق شارالار بۇگىن قاراعاندى وبلىسىنىڭ بارلىق وڭىرىندە جالعاسىن تابۋدا.
ەكوباستاما قوعامدىق اۋماقتاردى تازارتۋعا، رۇقساتسىز قوقىس ورىندارىن جويۋعا، سونداي-اق قالدىقتاردى بولەك جيناۋ مادەنيەتىن قالىپتاستىرۋعا باعىتتالعان.
تازالىق جۇمىستارىنا ەرىكتىلەر، ستۋدەنتتەر جانە ءتۇرلى ۇيىمداردىڭ قىزمەتكەرلەرى بەلسەنە قاتىستى.
