الماتى وبلىسىندا پانفيلوۆ اۋىلدىق وكرۋگىنىڭ اكىمى دۋلات داۋلەتاليەۆ جول اپاتىنا ۇشىرادى، دەپ حابارلايدى "ادىرنا" ۇلتتىق پورتالى Dalanews.kz-كە سىلتەمە جاساپ.
الدىن الا مالىمەت بويىنشا، وقيعا نارىنقول تاسجولىندا بولعان. كولىكتە بىرنەشە ادام وتىرعان، ولاردىڭ اڭ اۋلاۋعا شىققانى ايتىلادى. جول اپاتى سالدارىنان ءبىر ادام وقيعا ورنىندا كوز جۇمعان، تاعى ۇشەۋى اۋرۋحاناعا جەتكىزىلگەن. كەيىن زارداپ شەككەندەردىڭ ءبىرى ءتورتىنشى كۇنى قايتىس بولدى.
رايىمبەك اۋداندىق اۋرۋحاناسىنىڭ ديرەكتورى رۋسلان كوككوزوۆتىڭ سوزىنشە، اكىم دۋلات داۋلەتاليەۆ باستاپقىدا نارىنقولداعى اۋرۋحانادا ەم قابىلداعان. جاراقاتى اۋىر بولعاندىقتان، ول الماتى وبلىستىق كلينيكالىق اۋرۋحاناسىنا اۋىستىرىلعان.
"ونىڭ دا جاراقاتتارى اۋىر بولدى. بارلىق قاجەتتى مەديتسينالىق كومەك كورسەتىلدى. قازىرگى ۋاقىتتا جاعدايى ديناميكادا جاقسارىپ كەلەدى", – دەدى كوككوزوۆ.
وقيعاعا بايلانىستى ءتيىستى تەكسەرۋ جۇمىستارى جۇرگىزىلىپ جاتىر.
