13 قىركۇيەك كۇنى قاراعاندى – قارقارالى تاس جولىندا قايعىلى جول اپاتى تىركەلدى، دەپ حابارلايدى "ادىرنا" ۇلتتىق پورتالى.
شەشەنقارا اۋىلىنىڭ ماڭىندا ەكى جەڭىل كولىكتىڭ سوقتىعىسۋى سالدارىنان بەس ادام كوز جۇمىپ، ەكى ادام اۋىر جارالانعان.
پوليتسيانىڭ مالىمەتىنشە، 33 جاستاعى Ford Mondeo جۇرگىزۋشىسى جۇك كولىگىن باسىپ وزۋ كەزىندە قارسى جولاققا شىعىپ كەتىپ، Changan كولىگىمەن بەتپە-بەت سوقتىعىسقان. قاتتى سوققىدان 38 جاستاعى Changan جۇرگىزۋشىسى مەن ونىڭ جولاۋشىسى جانە Ford Mondeo كولىگىنىڭ ءۇش جولاۋشىسى وقيعا ورنىندا قازا تاپتى.
جارالانعان ەكى ادام دەرەۋ اۋرۋحاناعا جەتكىزىلگەن.
دەنساۋلىق ساقتاۋ باسقارماسىنىڭ حابارلاۋىنشا، زارداپ شەككەندەردىڭ جاعدايى اۋىر. ولاردىڭ اراسىندا ءبىر ەرەسەك ادام مەن ەكى بالا بار. بالالار سانيتارلىق اۆياتسيا ارقىلى وبلىستىق بالالار اۋرۋحاناسىنا جەتكىزىلىپ، جانساقتاۋ بولىمىنە ورنالاستىرىلدى.
قايعىلى وقيعادان كەيىن Ford Mondeo جۇرگىزۋشىسىنە قاتىستى قىلمىستىق ءىس قوزعالدى. ول ۋاقىتشا ۇستاۋ يزولياتورىنا قامالدى.
ەسكە سالا كەتەيىك، 14 قىركۇيەك كۇنى «الماتى – وسكەمەن» اۆتوجولىنىڭ 479-شاقىرىمىندا ءۇش اۆتوكولىك قاتىسقان جول-كولىك وقيعاسى ورىن الىپ، اپات سالدارىنان وقيعا ورنىندا 10 ادام قازا تاپقان ەدى.
سونداي-اق، 11 قىركۇيەك كۇنى ماڭعىستاۋ وبلىسىندا جول اپاتى ورىن الىپ، 10 ادام قازا تاپقان بولاتىن.
