بيىل مامىر ايىندا مەملەكەت باسشىسى اقوردادا وتكەن جيىندا باس پروكۋراتۋراعا ءتارتىپ ساقشىلارىنىڭ «قيالىنان تۋعان» قىلمىستىق ىستەردى توقتاتۋدى تاپسىردى. ايتسە دە بۇل ءۇردىس وزگەرە قويماعانعا ۇقسايدى.
بۇگىندە قىلمىستىق قۋدالاۋ وربيتاسىنا بۇرىنعىداي قاراپايىم ازاماتتار عانا ەمەس، اتقارۋشى بيلىك ورگاندارىنىڭ لاۋازىمدى تۇلعالارى دا كوپتەپ تارتىلىپ ءجۇر.
ماسەلەن، وتكەن جىلدىڭ 10 جەلتوقسانىندا انتيكور اتىراۋ قالاسىنداعى اباي ەسكەرتكىشىن ورناتۋ بويىنشا مەملەكەتتىك ساتىپ الۋ شارتىن جاساعانى ءۇشىن جشس باسشىسىنان پارا الدى دەگەن كۇدىكپەن حامەنوۆا باقىتگۇلدى (اتىراۋ وبلىسى اكىمىنىڭ ورىنباسارى، قازىر قاماۋدا) ۇستادى.
نەگىزى پارا الۋ بەلگىلى ءبىر ماسەلە ءتيىمدى شەشىلۋ ءۇشىن لاۋازىمدى ادامعا بەرىلگەن اقشا، باعالى قاعاز، باسقا دا مۇلىك نەمەسە مۇلىكتىك قۇقىق بولىپ سانالادى.
الايدا تەرگەۋ ماتەريالدارىن زەرتتەي كەلە انىقتالعانى - قر مادەنيەت جانە سپورت مينيسترلىگى جانىنداعى ارنايى كوميسسيانىڭ شەشىمىمەن ەسكەرتكىش ورناتۋشى 2019 جىلى قاراشادا، ياعني ب.حامەنوۆانىڭ وبلىس اكىمى ورىنباسارى قىزمەتىنە كەلەرىنەن 5 اي بۇرىن بەكىتىلگەن.
ارنايى كوميسسيانىڭ ءدال وسى شەشىمى ەسكەرتكىش نۇسقاسىنىڭ اۆتورىمەن مەملەكەتتىك ساتىپ الۋ شارتىن جاساسۋعا نەگىز بولادى. باسقاشا ايتقاندا، اكىمدىكتىڭ ارنايى كوميسسيا شەشىمىمەن كونكۋرس جەڭىمپازى دەپ تانىلعان ەسكەرتكىش اۆتورى قىزمەتىن ساتىپ الۋدان باسقا تاڭداۋى بولمايدى.
بۇل شەشىم قايتا قاراۋعا جاتپايتىندىقتان، اتىراۋ قالاسىنىڭ اكىمدىگى ەسكەرتكىشتى دايىنداۋ جانە جەتكىزۋ ءۇشىن جشس-مەن كەلىسىم-شارت جاساسقان. سوندىقتان بۇل كەلىسىم-شارتتىڭ جاسالۋىنا سول كەزدە ءماجىلىس دەپۋتاتى لاۋازىمىنداعى ب.حامەنوۆانىڭ مۇلدەم قاتىسى جوق جانە ول جشس-مەن جاسىرىن بايلانىس جاساي المايدى دا، سەبەبى ەسكەرتكىش ورناتۋعا قاتىستى بارلىق جاۋاپكەرشىلىك اتىراۋ قالاسى اكىمدىگىنە جۇكتەلگەن.
حامەنوۆاعا تاعىلعان ايىپتىڭ كۇماندىلىگىن جانە ناقتى ايعاقتىڭ جوق ەكەنىن ەسكەرگەن سوت ونى تەرگەۋ مەرزىمىندە قاماۋعا الۋدان نەگىزدى تۇردە باس تارتىپ، بۇلتارتپاۋ شاراسىنىڭ نەعۇرلىم قاتاڭ ەمەس تۇرىمەن شەكتەلدى. سونداي-اق حامەنوۆا مەن ونىڭ تۋىستارىنىڭ ءىستى تولىق ءارى وبەكتيۆتى قاراستىرۋعا كەدەرگى كەلتىرەتىنىنە ناقتى دالەلدەردىڭ بولماۋى دا قاپەرگە الىندى.
بۇل شەشىم جاريالانعاننان كەيىن سوتقا سىرتتان قىسىم كورسەتىلىپ، حامەنوۆانى كەز كەلگەن ادىسپەن قاماۋعا الۋ تاپسىرىلدى جانە ول بىرنەشە كۇننەن كەيىن مۇلتىكسىز ورىندالدى.
ۋاقىتشا ۇستاۋ يزولياتورىنا ورنالاستىرۋعا زاڭدى نەگىز بولماسا دا، سوت «ب.حامەنوۆا ءوز كىناسىن مويىندامادى جانە سونىمەن قاتار تانىستارى ارقىلى كۋاگەرلەرگە قىسىم كورسەتىپ، جالعان اقپارات تاراتۋى مۇمكىن» دەگەن جەلەۋمەن تەمىر تورعا توعىتتى.
الايدا سوت ەشكىمنىڭ كىناسىزدىگىن دالەلدەۋگە مىندەتتى ەمەستىگىن، ونىڭ پىكىرىن جاريالاۋدى شەكتەۋ ديكتاتورلىق رەجيمگە اپاراتىن توتە جول ەكەنىن ەسكەرمەدى.
بۇگىن حامەنوۆانىڭ ءىسىن قاراۋ پروتسەسى باستالدى. جاڭا قازاقستاندا ەڭ بولماعاندا سوت انتيكور مەن پروكۋراتۋرانىڭ ادىلەتسىز شەشىمدەرىن قولدامايتىنىنا شىن سەنگىمىز كەلەدى.
ب. حامەنوۆانىڭ ايىپتاۋ اكتىسىمەن تانىستىرىلماۋىنا بايلانىستى سوت وتىرىسى 11 تامىزعا شەگەرىلدى.
نۇربەك الدابەرگەنوۆ
رەداكتسيادان:
بۇل رەداكتسيامىزعا جولدانعان وقىرمان حاتى. رەداكتسيانىڭ ۇستانىمى اۆتوردىڭ كوزقاراسىمەن سايكەس كەلمەۋى مۇمكىن.
