4 قىركۇيەكتە الماتىلىق «قايراتتىڭ» قاقپاشىسى تەمىرلان اناربەكوۆ قازاقستاننىڭ ۇلتتىق فۋتبول قۇراماسى ساپىندا العاش رەت دەبيۋت جاسايدى، دەپ حابارلايدى "ادىرنا" ۇلتتىق پورتالى.
21 جاستاعى قاقپاشى قازاقستاننىڭ ەرەسەكتەر قۇراماسىنان تۇڭعىش رەت شاقىرتۋ الىپ وتىر جانە 4 قىركۇيەكتە 2026 جىلعى الەم چەمپيوناتىنىڭ ىرىكتەۋ كەزەڭى اياسىندا ۋەلس قۇراماسىنا قارسى الاڭعا شىعۋى مۇمكىن.
«كلۋبتاعى جەتىستىكتى ۇمىتىپ، ەندى قۇرامانىڭ پايداسىنا ەڭبەك ەتۋىمىز كەرەك. «سەلتيك» — تاريحتا قالدى. قۇرامامەن دە تاريح جازامىز. بۇل تەك مەنىڭ ەڭبەگىم ەمەس، بۇكىل جاتتىقتىرۋشىلار شتابى مەن باسشىلىقتىڭ ەڭبەگى. بارلىعىنا العىس ايتامىن. قۇراما ويىندارىنا دايىن بولامىز»، - دەدى تەمىرلان اناربەكوۆ.
ەسكە سالا كەتەيىك، تەمىرلان اناربەكوۆ ۋەفا چەمپيوندار ليگاسىنىڭ پلەي-وفف كەزەڭىندەگى «سەلتيككە» قارسى قارىمتا ماتچتا قاھارمان اتاندى. ول ءۇش بىردەي پەنالتيدى قايتارىپ، الماتىلىق كلۋبتى ەۋروپانىڭ ەڭ بەدەلدى كلۋبتىق ءتۋرنيرىنىڭ نەگىزگى كەزەڭىنە شىعاردى.
25 تامىزدا اناربەكوۆ پەن «قايراتتىڭ» تاعى ءۇش ويىنشىسى قازاقستان قۇراماسىنا ۋەلس پەن بەلگياعا قارسى وتەتىن ىرىكتەۋ ماتچتارىنا شاقىرتۋ العان بولاتىن.
