قازاقستان رەسپۋبليكاسى پرەزيدەنتى اكىمشىلىگىمەن كەلىسىمى بويىنشا اسحات ورالوۆ ماڭعىستاۋ وبلىسى اكىمىنىڭ ءبىرىنشى ورىنباسارى بولىپ تاعايىندالدى.
اسحات ورالوۆ بۇعان دەيىن قر پرەزيدەنتى اكىمشىلىگىنىڭ مەملەكەتتىك ينسپەكتورى قىزمەتىن اتقارعان. ول ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن جانە رەسەي ءسىم جانىنداعى ماسكەۋ مەملەكەتتىك حالىقارالىق قاتىناستار ينستيتۋتىن (مگيمو) تامامداعان، PhD دارەجەسى بار.
ەڭبەك جولىن 2011 جىلى ل.ن. گۋميلەۆ اتىنداعى ەۇۋ-دىڭ الەۋمەتتىك-تاربيە جۇمىسى دەپارتامەنتىندە باس مامان بولىپ باستاعان. كەيىن «نۇر وتان» پارتياسىنىڭ فيليالىندا، استانا قالاسى اكىمدىگىندە، جاستار ساياساتى سالاسىندا ءتۇرلى باسشىلىق قىزمەتتەر اتقاردى.
ودان بولەك پاۆلودار وبلىسى اكىمىنىڭ ورىنباسارى، قر اقپارات جانە قوعامدىق دامۋ ۆيتسە-ءمينيسترى، استانا قالاسى اكىمىنىڭ ورىنباسارى بولدى. سونداي-اق «Nur Otan» جانە «Amanat» پارتياسىنىڭ اتقارۋشى حاتشىسى قىزمەتىن اتقارعان.
2023 جىلعى 4 قاڭتاردا مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ مادەنيەت جانە سپورت ءمينيسترى بولىپ تاعايىندالعان. 2024–2025 جىلدارى قر پرەزيدەنتى اكىمشىلىگىنىڭ مەملەكەتتىك ينسپەكتورى قىزمەتىن اتقاردى.
