قازاقستاندا نەسيە بەرۋ ەرەجەسىنە جاڭا تالاپ ەنگىزىلەدى، دەپ حابارلايدى "ادىرنا" ۇلتتىق پورتالى.
ەندى بانكتەر ءىرى كولەمدەگى قارىزداردى راسىمدەۋ كەزىندە كۇتۋ رەجيمىن ساقتاۋعا مىندەتتى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى مادينا ابىلقاسىموۆا ايتتى.
ەرەجەگە سايكەس، ەگەر كرەديت سوماسى 1 ميلليون تەڭگەدەن اسسا، بانك قارىزدى بىردەن بەرمەي، 24 ساعات كۇتۋ مەرزىمىن بەلگىلەيدى. وسى ۋاقىت ارالىعىندا قارىز الۋشىنىڭ شىنىمەن ءوزى راسىمدەپ جاتقانى تەكسەرىلەدى جانە ونىڭ الاياقتاردىڭ ىقپالىنا تۇسپەگەنى انىقتالادى. بۇل مەرزىم قارىز الۋشىعا دا ويلانۋعا جانە قاجەت بولسا، نەسيە الۋدان باس تارتۋعا مۇمكىندىك بەرەدى.
ال 150-دەن 250 اەك-كە دەيىنگى (شامامەن 600 مىڭنان 1 ميلليون تەڭگەگە دەيىنگى) قارىزدار ءۇشىن قىسقارتىلعان مەرزىم ەنگىزىلدى – ول 8 ساعاتقا سوزىلادى.
ابىلقاسىموۆانىڭ ايتۋىنشا، بۇرىن بانكتىك قوسىمشا ارقىلى نەسيە نەبارى بىرنەشە مينۋتتا راسىمدەلەتىن. ەندى 600 مىڭ تەڭگەدەن اساتىن سومادا بانكتەر قارىزدى بىردەن بەرمەي، 8-دەن 24 ساعاتقا دەيىنگى ارالىقتا قوسىمشا تەكسەرىس جۇرگىزۋگە ءتيىس.
بۇل شارا الاياقتىق نەسيەلەردىڭ الدىن الۋ ءۇشىن قولعا الىنىپ وتىر.
