قىرعىزستاندا جوعالعان يراندىق الپينيستەر قازا تاپتى دەپ تانىلدى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
قىرعىزستاندا «جەڭىس» شىڭىن باعىندىرۋ بارىسىندا جوعالىپ كەتكەن يراندىق الپينيستەر حاسسان ماشحاديوگلۋ مەن ماريام پيلەحۆاري قازا تاپتى دەپ تانىلدى. بۇل تۋرالى الپينيستەر قاۋىمداستىعى مەن جەرگىلىكتى قۇتقارۋشىلار حابارلادى. ىزدەستىرۋ جۇمىستارى توقتاتىلعان.
يراندىق الپينيستەر 5 تامىزدا 7 439 مەترلىك «جەڭىس» شىڭىنا كوتەرىلۋدى باستاعان. 11 تامىزدا ولار شىڭعا جەتكەنىمەن، كەلەسى كۇنى 7 300 مەتر بيىكتىكتە رەسەيلىك الپينيست ناتاليا ناگوۆيتسينانى كەزدەستىرگەن سوڭ بايلانىس ۇزىلگەن. قۇتقارۋشىلار ولاردىڭ جەكە زاتتارى مەن سنارياجەنيەسىن تاپقانىمەن، وزدەرىن تابا المادى.
بۇل الپينيستەردىڭ اتالمىش شىڭعا كوتەرىلۋگە ءۇشىنشى تالپىنىسى بولعان. ماشحاديوگلۋ يرانداعى الپينيستىك كلۋبتى باسقارعان، ال پيلەحۆاري جاتتىقتىرۋشى بولىپ جۇمىس ىستەگەن.
ايتا كەتەيىك، وسىعان دەيىن الپينيست ناتاليا ناگوۆيتسينا دا تاۋعا شىعىپ، كەيىننەن اياعىن سىندىرىپ العان. قىرعىزستان ونى قازا تاپتى دەپ تانىدى. ال ناتالياعا كومەكتەسپەك بولعان شەتەلدىك الپينيستەر دە كوز جۇمعانى حابارلانعان بولاتىن.
