فوتو: rams-global.com
الماتىدا 40 قاباتتى كوپفۋنكتسيونالدى تۇرعىن كەشەنى (كتك) Rams Beyond قۇرىلىسى توقتاتىلدى. بۇل تۋرالى قالالىق اكىمدىكتىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
«جەرگىلىكتى تۇرعىنداردىڭ Central Avenue تۇرعىن ءۇي كەشەنى بويىنشا جولداعان وتىنىشىنە سايكەس، جەر ۋچاسكەسىنىڭ يەسى – «BR Construction Qazaqstan» جشس-نا (بۇرىنعى اتاۋى – «Berton Ram» جشس) قاتىستى جوسپاردان تىس تەكسەرۋ تىركەلدى. ونىڭ ناتيجەسىندە تاپسىرىس بەرۋشى تاراپىنان كوممەرتسيالىق ءۇي-جايلارى مەن پاركينگى بار تۇرعىن كەشەنىن سالۋ ءۇشىن قازانشۇڭقىر قازۋ جانە مۇنارالى كراننىڭ ىرگەتاسىن قۇيۋ جۇمىستارى جوبالىق-سمەتالىق قۇجاتتاماسىز، اۆتورلىق جانە تەحنيكالىق قاداعالاۋسىز، قۇرىلىس-مونتاج جۇمىستارىن باستاۋ تۋرالى حابارلاندىرۋسىز باستالعانى انىقتالدى. بۇل قازاقستان رەسپۋبليكاسىنىڭ «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى» زاڭىنىڭ تالاپتارىن بۇزادى»، – دەپ جاۋاپ بەردى اكىمدىك قازتاگ رەداكتسياسىنىڭ ساۋالىنا بەيسەنبى كۇنى.
قالالىق اكىمدىكتىڭ مالىمەتىنشە، جوسپاردان تىس تەكسەرۋ اياقتالعان سوڭ تاپسىرىس بەرۋشىگە ەكسپرەسس-پوشتا ارقىلى تەكسەرۋ ناتيجەلەرى تۋرالى حابارلاما مەن اكت، انىقتالعان زاڭبۇزۋشىلىقتاردى جويۋ جونىندە نۇسقاما جانە قۇرىلىس قىزمەتىن توقتاتۋ تۋرالى اكت جىبەرىلگەن.
«اتالعان قۇجاتتاردى العاننان كەيىن تاپسىرىس بەرۋشىگە قر اقبتك 316-بابىنىڭ 1-بولىگى (جوبالىق-سمەتالىق) قۇجاتتاماسىز نەمەسە ءتيىستى ساراپتامادان وتپەگەن قۇجاتتاما نەگىزىندە قۇرىلىس (قايتا قۇرۋ، قالپىنا كەلتىرۋ، كەڭەيتۋ، تەحنيكالىق قايتا جاراقتاندىرۋ، جاڭعىرتۋ، كۇردەلى جوندەۋ، جۇرگىزۋ), 321-باپ (تەحنيكالىق جانە اۆتورلىق قاداعالاۋسىز قۇرىلىس جۇرگىزۋ) بويىنشا اكىمشىلىك حاتتامالار تولتىرىلادى»، – دەلىنگەن اكىمدىكتىڭ جاۋابىندا.
ەسكە سالايىق، 2 شىلدەدە ءماجىلىس دەپۋتاتى سەرگەي پونومارەۆ RAMS كومپانياسى «الماتى پارك» جوباسىن جۇزەگە اسىرىپ جاتقانىن جانە «سەيفۋللين – تيميريازەۆ قيىلىسىنداعى شاعىن جەر تەلىمىندە» قۇرىلىسشى كومپانيا بەس 10 قاباتتى عيماراتتىڭ ورتاسىنا 40 قاباتتى VIP مۇنارا سالۋدى جوسپارلاپ وتىرعانىن مالىمدەگەن بولاتىن. ول بۇل جوباعا قارسى ەكەنىن ءبىلدىرىپ، جاڭا نىسان مەملەكەتتىك ساراپتامادان ءوتىپ جاتقانىن، سونداي-اق پرەزيدەنتتىڭ تاپسىرماسى بويىنشا نۇكتەلىك قۇرىلىستى توقتاتۋ كەرەگىن ەسكە سالعان. بۇعان جاۋاپ رەتىندە شەنەۋنىكتەر 40 قاباتتى «VIP-تۇرعىن ءۇي كەشەنىنىڭ» قۇرىلىسىن زاڭدى دەپ مالىمدەگەن. الايدا، 3 تامىز كۇنى پرەزيدەنت قاسىم-جومارت توقاەۆ الماتى اكىمى دارحان ساتىبالدىنى قابىلداپ، الماتىنىڭ جوعارعى بولىگىندە نۇكتەلىك قۇرىلىس جۇرگىزۋگە تىكەلەي تىيىم سالدى.
