foto: rams-global.com
Almatyda 40 qabatty köpfunksionaldy tūrǧyn keşenı (KTK) Rams Beyond qūrylysy toqtatyldy. Būl turaly qalalyq äkımdıktıŋ baspasöz qyzmetı mälımdedı, dep habarlaidy “Adyrna”.
«Jergılıktı tūrǧyndardyŋ Central Avenue tūrǧyn üi keşenı boiynşa joldaǧan ötınışıne säikes, jer uchaskesınıŋ iesı – «BR Construction Qazaqstan» JŞS-na (būrynǧy atauy – «Berton Ram» JŞS) qatysty jospardan tys tekseru tırkeldı. Onyŋ nätijesınde tapsyrys beruşı tarapynan kommersiialyq üi-jailary men parkingı bar tūrǧyn keşenın salu üşın qazanşūŋqyr qazu jäne mūnaraly krannyŋ ırgetasyn qūiu jūmystary jobalyq-smetalyq qūjattamasyz, avtorlyq jäne tehnikalyq qadaǧalausyz, qūrylys-montaj jūmystaryn bastau turaly habarlandyrusyz bastalǧany anyqtaldy. Būl Qazaqstan Respublikasynyŋ «Qazaqstan Respublikasyndaǧy säulet, qala qūrylysy jäne qūrylys qyzmetı turaly» Zaŋynyŋ talaptaryn būzady», – dep jauap berdı äkımdık QazTAG redaksiiasynyŋ saualyna beisenbı künı.
Qalalyq äkımdıktıŋ mälımetınşe, jospardan tys tekseru aiaqtalǧan soŋ tapsyrys beruşıge ekspress-poşta arqyly tekseru nätijelerı turaly habarlama men akt, anyqtalǧan zaŋbūzuşylyqtardy joiu jönınde nūsqama jäne qūrylys qyzmetın toqtatu turaly akt jıberılgen.
«Atalǧan qūjattardy alǧannan keiın tapsyrys beruşıge QR ÄQBtK 316-babynyŋ 1-bölıgı (jobalyq-smetalyq) qūjattamasyz nemese tiıstı saraptamadan ötpegen qūjattama negızınde qūrylys (qaita qūru, qalpyna keltıru, keŋeitu, tehnikalyq qaita jaraqtandyru, jaŋǧyrtu, kürdelı jöndeu, jürgızu), 321-bap (tehnikalyq jäne avtorlyq qadaǧalausyz qūrylys jürgızu) boiynşa äkımşılık hattamalar toltyrylady», – delıngen äkımdıktıŋ jauabynda.
Eske salaiyq, 2 şıldede Mäjılıs deputaty Sergei Ponomarev RAMS kompaniiasy «Almaty park» jobasyn jüzege asyryp jatqanyn jäne «Seifullin – Timiriazev qiylysyndaǧy şaǧyn jer telımınde» qūrylysşy kompaniia bes 10 qabatty ǧimarattyŋ ortasyna 40 qabatty VIP mūnara saludy josparlap otyrǧanyn mälımdegen bolatyn. Ol būl jobaǧa qarsy ekenın bıldırıp, jaŋa nysan memlekettık saraptamadan ötıp jatqanyn, sondai-aq prezidenttıŋ tapsyrmasy boiynşa nüktelık qūrylysty toqtatu keregın eske salǧan. Būǧan jauap retınde şeneunıkter 40 qabatty «VIP-tūrǧyn üi keşenınıŋ» qūrylysyn zaŋdy dep mälımdegen. Alaida, 3 tamyz künı prezident Qasym-Jomart Toqaev Almaty äkımı Darhan Satybaldyny qabyldap, Almatynyŋ joǧarǧy bölıgınde nüktelık qūrylys jürgızuge tıkelei tyiym saldy.
