الماتىدا ەكولوگيالىق احۋالدى جاقسارتۋ ماقساتىندا ەسكى اۆتوكولىكتەرگە ارنالعان اقىلى ايماقتار ەنگىزۋ ماسەلەسى قاراستىرىلىپ جاتىر، دەپ حابارلايدى "ادىرنا" ۇلتتىق پورتالى.
تومەن ەميسسيالىق ايماقتار (LEZ) كولىكتەردى شەكتەۋ ءۇشىن ەمەس، جاڭا ەكولوگيالىق تالاپتاردى ەنگىزۋ ارقىلى اۋانىڭ لاستانۋىن ازايتۋ ءۇشىن قۇرىلماق. ەۆرو-5 جانە ەۆرو-6 ستاندارتتارىنا ساي كولىكتەر بۇل ايماقتاردا تەگىن جۇرە الادى.
جۇيە الدىمەن پيلوتتىق رەجيمدە ىسكە قوسىلادى، وسى كەزەڭدە تولەم الىنبايدى. بۇل ۋاقىتتا جۇيە تەستىلەنىپ، كولىك اعىمدارى تالدانادى.
قالاداعى اۋاعا شىعاتىن زياندى زاتتاردىڭ شامامەن 60%-ى كولىكتەردەن تارايدى، بۇل جىلىنا 112 مىڭ تونناعا جۋىق. ونىڭ باسىم بولىگى ەسكى تەحنيكانىڭ ۇلەسىندە. ستاتيستيكاعا سۇيەنسەك، الماتىداعى اۆتوپاركتىڭ 65,3%-ى (شامامەن 454,4 مىڭ كولىك) ەسكى.
اقىلى ايماقتاردىڭ ناقتى شەكارالارى ازىرگە بەكىتىلگەن جوق. ولار كەيىن قالا اكىمدىگىنىڭ قاۋلىسىمەن انىقتالىپ، رەسمي جاريالانادى. جوبادا ارنايى جول بەلگىلەرى، جول تاڭبالارى جانە اقپاراتتىق جۇيەلەر دە قاراستىرىلعان.
باسقارما وكىلدەرى پيلوتتىق جوبا شاعىن اۋماقتا تەگىن نەگىزدە باستالىپ، كەيىن مونيتورينگ ناتيجەلەرىنە قاراي كەڭەيتىلەتىنىن نەمەسە تۇزەتىلەتىنىن، سودان سوڭ اقىلى جۇيەگە كوشىرىلەتىنىن ايتتى.
