بۇگىن – ءمۇسىنشى، ۇلتتىق كاسىبي ءمۇسىن ونەرىنىڭ نەگىزىن سالۋشىلاردىڭ ءبىرى، پروفەسسور، قازاق كسر مەملەكەتتىك سىيلىعىنىڭ لاۋرەاتى، قازاق كسر حالىق سۋرەتشىسى، قازاقستاننىڭ ونەر قايراتكەرى حاكىمجان ناۋرىزباەۆتىڭ تۋعانىنا 100 جىل تولدى.
حاكىمجان ناۋرىزباەۆ الماتىداعى ابايدىڭ، شوقان ءۋاليحانوۆتىڭ، م.ي. كالينيننىڭ، تارازداعى جامبىل جاباەۆتىڭ، الماتى وبلىسىنداعى جانسۇگىروۆ اۋىلىندا ۆ.ي. لەنيننىڭ ەسكەرتكىشتەرىن جاساعان.
ءمۇسىنشىنىڭ «جاس جامبىل»، «امانگەلدى يمانوۆ»، «قۇرمانعازى»، «ساكەن سەيفۋللين»، «شوقان ءۋاليحانوۆ» سياقتى تاريحي پورترەتتەرى فورمانىڭ مۇقيات جاسالۋىمەن جانە كۇردەلى پسيحولوگيالىق سيپاتىمەن ەرەكشەلەنەدى.
1950 جىلداردىڭ باسىندا الماتىدا ابايعا ەسكەرتكىش ورناتۋ كونكۋرسىنا حاكىمجان ناۋرىزباەۆ قاتىسىپ، 1960 جىلى ابايدىڭ 115 جىلدىعىنا ارنالعان مونۋمەنتتى جاساۋعا تاڭدالادى.
جۇمىسقا كىرىسپەس بۇرىن ول ابايدىڭ تۋعان جەرىنە بارىپ، جەرگىلىكتى اقساقالدارمەن سويلەسىپ، م.اۋەزوۆتى كەڭەسشى ەتىپ الادى.
اۋىلشارۋاشىلىق ينستيتۋتىنىڭ تار شەبەرحاناسىندا جاسالعان ءمۇسىندى اۋەزوۆ ءجيى كەلىپ، جۇمىستى باقىلاپ وتىرعان. العاش كورگەندە ول سىن ايتقانىمەن، سوڭعى نۇسقاسىن كورگەندە: «مىنە، بۇل – اباي!» دەپ ماقۇلداعان. بۇل تۋرالى ءمۇسىنشى ءوز ەستەلىكتەرىندە بولىسەدى.
