تۇركىستان وبلىسىنا قاراستى شاردارا اۋدانىندا كورنەكتى اقىن، قازاقستان جازۋشىلار وداعىنىڭ مۇشەسى، ادەبيەت سىنشىسى ءامىرحان بالقىبەكتىڭ قۇرمەتىنە ەسكەرتكىش-بيۋست اشىلدى. بۇل تۋرالى اقىن، جۋرناليست اسىلان تىلەگەن جازدى، دەپ حابارلايدى «ادىرنا» ءتىلشىسى.
«كوڭىل قۋانتار جاڭالىق! اقىن، ادەبيەت سىنشىسى ءامىرحان بالقىبەك اعامىزعا تۋعان جەرى شاردارادا بيۋست-ەسكەرتكىش ورناتىلدى! مۇسىنشىگە العىس! اعاعا ۇقساپ-اق تۇر ەكەن!—دەدى ول.
ەسكەرتكىش اۋدان ورتالىعىنداعى ساياباققا قويىلدى.
ايتا كەتەيىك، ءامىرحان بالقىبەك 1969 جىلى تۇركىستان وبلىسىندا تۋعان. ءال-فارابي اتىنداعى قازاق ۇلتتىق ۋنيۆەرسيتەتىندە ءبىلىم العان. شاردارا اۋداندىق «وسكەن ءوڭىر»، رەسپۋبليكالىق «جاس الاش»، «انا ءتىلى» گازەتتەرىنىڭ، «پاراسات» جۋرنالىنىڭ ءتىلشىسى، «قازاق ادەبيەتى» گازەتىنىڭ ءبولىم مەڭگەرۋشىسى، «جاس قازاق» رەسپۋبليكالىق گازەتى ادەبيەت جانە عىلىم ءبولىمىنىڭ رەداكتورى قىزمەتتەرىن اتقارعان. اقىننىڭ بىرقاتار ولەڭدەرى «جاس اقىندار پوەزياسىنىڭ انتولوگياسى»، «اۋىلدان ۇشقان اققۋلار»، «تولقىننان تولقىن تۋادى» ۇجىمدىق جيناقتارىنا ەنگەن. «مەتامورفوزا»، «سىنعان ساۋلەنىڭ شاعىلىسۋى» جىر كىتاپتارىنىڭ اۆتورى. كورنەكتى تۇلعا 2014 جىلدىڭ 8 ساۋىرىندە قايتىس بولدى.
