استانادا دارىگەرلەر اباي وبلىسى ءۇرجار اۋدانى بەستەرەك اۋىلىنان جەتكىزىلگەن جاراقات العان بالالاردىڭ جاعدايى تۋرالى مالىمدەدى، دەپ حابارلايدى “ادىرنا” ۇلتتىق پورتالى.
بۇگىن كۇندىز سانيتارلىق اۆياتسيانىڭ ۇلتتىق ۇيلەستىرۋ ورتالىعىنىڭ بورتى ءۇرجار اۋدانىنان استاناعا جاراقات العان ەكى بالانى جەتكىزدى. جاعدايىنىڭ تۇراقسىزدىعىنا بايلانىستى 9 جاستاعى قىز وبلىستىڭ باس انەستەزيولوگ-رەانيماتولوگىنىڭ باقىلاۋىندا جەرگىلىكتى ستاتسيوناردا قالعان.
استانانىڭ دەنساۋلىق ساقتاۋ باسقارماسىنىڭ ءباسپاسوز قىزمەتى حابارلاعانداي، سانيتارلىق اۆياتسيا جەلىسى ارقىلى ەكى بالا №2 قالالىق بالالار اۋرۋحاناسىنا جەتكىزىلگەن. قازىرگى ۋاقىتتا ولار مامانداردىڭ باقىلاۋىندا جانساقتاۋ بولىمىندە جاتىر.
“بالالاردىڭ جاعدايى اۋىر. كوپتەگەن سىنىقتار، اۋىر جاراقاتتار، تراۆماتيكالىق شوك العاگ. بارلىق قاجەتتى مەديتسينالىق كومەك تولىق كولەمدە كورسەتىلۋدە، ءتيىستى تەكسەرۋلەر مەن ەمدەۋ شارالارى جۇرگىزىلىپ جاتىر. جاعداي دارىگەرلەردىڭ باقىلاۋىندا”، – دەلىنگەن حابارلامادا.
اۋرۋحانانىڭ مەديتسينا ءبولىمى جونىندەگى ديرەكتوردىڭ ورىنباسارىنىڭ ايتۋىنشا، بالالار بىردەن جانساقتاۋ بولىمىنە جاتقىزىلعان.
“ەكى بالا: 9 جاستاعى قىز جانە 6 جاستاعى ۇل. قىزدىڭ جاعدايى اسا اۋىر دەپ باعالانۋدا. اۋىر جاراقاتتار، جابىق باس-مي جاراقاتى، يىق سۇيەكتەرىنىڭ كوپ سىنىقتى جىلجۋمەن سىنۋى، اۋىر دارەجەلى شوك العان. ۇلدىڭ جاعدايى دا اۋىر”، – دەدى ول.
بالالار قازىر قوسىمشا تەكسەرۋدەن ءوتىپ جاتىر، رەانيماتولوگتار ولاردىڭ جاعدايىن تۇراقتاندىرۋعا تىرىسۋدا.
ەسكە سالا كەتەيىك، 19 تامىز كۇنى بەستەرەك اۋىلىندا 55 جاستاعى جۇرگىزۋشى ءۇي قاقپاسىنىڭ جانىندا، جولدان 10 مەتر جەردە تۇرعان بالالاردى قاعىپ كەتكەن. ەكى بالا وقيعا ورنىندا قازا تاپسا، تاعى بىرەۋى اۋرۋحاناعا بارار جولدا كوز جۇمدى. ءۇش بالا ءتۇرلى جاراقاتپەن اۋرۋحاناعا جەتكىزىلدى.
ءۇرجار اۋدانى پوليتسيا ءبولىمىنىڭ حابارلاۋىنشا، جۇرگىزۋشى ۇستالىپ، ۋاقىتشا ۇستاۋ يزولياتورىنا قامالعان. ساراپتاما جۇرگىزۋشىنىڭ وقيعا كەزىندە ماس بولماعانىن كورسەتتى. قىلمىستىق ءىس قوزعالدى. قازىر پوليتسەيلەر اپاتتىڭ سەبەپتەرى مەن ءمان-جايىن انىقتاۋ ءۇشىن تەرگەۋ امالدارىن جۇرگىزۋدە. جۇرگىزۋشى ەكى ايعا قاماۋعا الىندى.
اباي وبلىسىنىڭ اكىمى بەرىك ءۋالي قازا تاپقان بالالاردىڭ وتباسىلارىنا قاجەتتى كومەك پەن قولداۋ كورسەتۋدى تاپسىردى. كەيىننەن بالالاردىڭ اۋىلداعى تۋىستارىنا قوناققا كەلگەنى بەلگىلى بولدى.
