ازەربايجان پرەزيدەنتى يلحام اليەۆ ۋكرايناعا گۋمانيتارلىق كومەك كورسەتۋ ءۇشىن قارجى ءبولۋ تۋرالى وكىمگە قول قويدى، دەپ حابارلايدى "ادىرنا" ۇلتتىق پورتالى.
"2025 جىلعا ارنالعان ازەربايجان رەسپۋبليكاسىنىڭ مەملەكەتتىك بيۋدجەتىندەگى ازەربايجان رەسپۋبليكاسىنىڭ پرەزيدەنتىنىڭ رەزەرۆتىك قورىنان ۋكرايناعا گۋمانيتارلىق كومەك كورسەتۋ ماقساتىندا ەلەكتر جابدىقتارىن ساتىپ الۋ جانە جونەلتۋ ءۇشىن ازەربايجان رەسپۋبليكاسىنىڭ ەنەرگەتيكا مينيسترلىگىنە 2 ميلليون اقش دوللارىنا تەڭ مانات كولەمىندە قاراجات ءبولىندى", – دەلىنگەن وكىمدە.
ايتا كەتەيىك، 10 تامىز كۇنى ۆلاديمير زەلەنسكي اقش پرەزيدەنتى دونالد ترامپتىڭ قولداۋىمەن ازەربايجان مەن ارمەنيا اراسىنداعى بەيبىت كەلىسىممەن قۇتتىقتاپ، يلحام اليەۆكە قوڭىراۋ شالدى.
"تەلەفون ارقىلى اڭگىمەلەسۋ بارىسىندا تاراپتار رەسەيدىڭ ۋكراينا اۋماعىنداعى ازەربايجاننىڭ SOCAR كومپانياسىنىڭ مۇناي بازاسىنا جانە باسقا دا نىساندارىنا، سونداي-اق ازەربايجان گازىن ۋكرايناعا جەتكىزەتىن گاز كومپرەسسورلىق ستانتسياسىنا جاسالعان ادەيى اۋە شابۋىلدارىن ايىپتادى. سونداي-اق، بۇل جاعدايدىڭ ازەربايجان مەن ۋكراينانىڭ ەنەرگەتيكا سالاسىنداعى ىنتىماقتاستىعىن توقتاتپايتىنىنا سەنىم ءبىلدىردى", – دەپ جازدى ازەربايجان پرەزيدەنتىنىڭ ءباسپاسوز قىزمەتى.
