الماتى وبلىسىندا جۇرگىزىلگەن ىزدەستىرۋ وپەراتسياسى بارىسىندا سوربۇلاق سۋ قويماسىنىڭ تۇبىنەن جوعالعان اسكەري تىكۇشاقتىڭ فراگمەنتتەرى مەن ءبىر ادامنىڭ دەنەسى تابىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قورعانىس مينيسترلىگى مالىمدەدى.
ىزدەۋ جۇمىستارى قورعانىس مينيسترلىگى، تجم، ءىىم جانە باسقا دا ۆەدومستۆولاردىڭ قاتىسۋىمەن، «قازاقستان عارىش ساپارى» اق سپۋتنيكتىك دەرەكتەرى نەگىزىندە جۇرگىزىلدى. اسكەري سۇڭگۋىرلەر شامامەن 14 مەتر تەرەڭدىكتەن تىكۇشاقتىڭ بولىكتەرىن جانە ءمايىتتى انىقتادى. قازىر مارقۇمدى سايكەستەندىرۋ جۇمىستارى ءجۇرىپ جاتىر.
ۆەدومستۆونىڭ مالىمەتىنشە، ىزدەستىرۋدى لايلى سۋ مەن ناشار كورىنۋشىلىك قيىنداتۋدا.
ەسكە سالساق، EC-145 اسكەري تىكۇشاعى 25 شىلدە كۇنى راداردان جوعالىپ كەتكەن. 26 شىلدەدە ونىڭ كەيبىر سىنىقتارى سوربۇلاقتان تابىلعانىمەن، ەكيپاجدى ىزدەۋ بۇگىنگە دەيىن جالعاسىپ كەلەدى.
