بيىل ۇبت بويىنشا ورتاشا كورسەتكىش الپىس التى بالل بولدى. بۇل تۋرالى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ مالىمدەدى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، 154 مىڭ تالاپكەر ەكى مۇمكىندىكتى ەسەپتەگەندە ۇبت-نى 276 مىڭ رەت تەست تاپسىرعان.
تەستىلەۋ قورىتىندىسى بويىنشا 103 مىڭنان استام تالاپكەر شەكتى بالل جينادى، بۇل قاتىسۋشىلاردىڭ جالپى سانىنىڭ 67%-ءى. وتكەن جىلمەن سالىستىرعاندا بۇل كورسەتكىش 7%-كە جوعارى. تەستىلەنۋشىلەردىڭ 51 مىڭعا جۋىعى (33%-ءى) شەكتى بالل جيناي المادى.
"ۇبت بويىنشا ورتاشا بالل 66 ۇپايدى قۇرادى. بيىل ەڭ جوعارى بالل – 139. 3179 وقۋعا ءتۇسۋشى 120 بالدان جوعارى جينادى", - دەدى ەمەلباەۆ.
ورتالىق ديرەكتورى بيىل ۇبت-عا تىيىم سالىنعان زاتتاردى كىرگىزۋ جانە ۇبت ەرەجەلەرىن بۇزۋ سانى ءبىرشاما ازايعانىن ەرەكشە اتاپ ءوتتى.
”ادىرنا” ۇلتتىق پورتالى
