قوستاناي قالاسىندا تولستوي كوشەسىندەگى پاتەرلەردىڭ بىرىندە ەر ادامنىڭ ءمايىتى تابىلدى، دەپ حابارلايدى "ادىرنا" ۇلتتىق پورتالى وبلىستىق پد سىلتەپ.
الدىن الا مالىمەت بويىنشا، مارقۇم بۇل ۇيدە تۇرماعان. كۋاگەرلەردىڭ ايتۋىنشا، ول پاتەرگە زاڭسىز كىرىپ، سول ۇيدە بولعان كامەلەتكە تولماعان بالانى اۋىر جاراقاتتاعان. كەيىن وزىنە-ءوزى قول جۇمساعان.
قوستاناي وبلىستىق پوليتسيا دەپارتامەنتى بۇل دەرەكتى راستادى. ۆەدومستۆو مالىمدەمەسىنە سايكەس، قازىرگى ۋاقىتتا كامەلەتكە تولماعان ادامنىڭ دەنساۋلىعىنا اۋىر زيان كەلتىرۋ جانە ءمايىت تابۋ فاكتىلەرى بويىنشا ەكى سوتقا دەيىنگى تەرگەۋ باستالدى.
«قازىرگى تاڭدا بارلىق قاجەتتى تەرگەۋ ارەكەتتەرى جۇرگىزىلۋدە. وزگە مالىمەتتەر تەرگەۋ مۇددەسىنە بايلانىستى جاريالانبايدى»، – دەپ حابارلادى دەپارتامەنتتىڭ ءباسپاسوز قىزمەتى.
جاراقات العان بالا مەديتسينالىق مەكەمەگە جەتكىزىلىپ، ءتيىستى كومەك كورسەتىلۋدە. وقيعا جۇرتشىلىق اراسىندا الاڭداۋشىلىق تۋعىزدى. قۇقىق قورعاۋ ورگاندارى ءىستىڭ ءمان-جايىن انىقتاۋدى جالعاستىرىپ جاتىر.
