Litva premer-ministrı jäne sosial-demokratiialyq partiiasynyŋ töraǧasy Gintautas Palukas jemqorlyqqa bailanysty dauly oqiǧalardan keiın ekı lauazymynan da ketetının mälımdedı, dep habarlaidy "Adyrna" ūlttyq portaly.
Palukas 2024 jyldyŋ jeltoqsanynda premer-ministr qyzmetıne taǧaiyndalǧan bolatyn. Alaida mamyr aiynyŋ soŋynda Laisvės TV YouTube arnasy men Siena jurnalistık zertteu ortalyǧy bırlesıp jürgızgen tekseru nätijelerı qoǧamda ülken rezonans tuǧyzdy. Tergeu barysynda Palukastyŋ būryn özı qūrǧan Granis kompaniiasynyŋ memlekettık ILTE damu bankınen 200 myŋ euro kölemınde jeŋıldetılgen nesie alǧany belgılı boldy. Ol kezde Palukas premer-ministr qyzmetınde bolǧan.
Sonymen qatar, ol basqarǧan Sagerta kompaniiasy Uni Trading kompaniiasynan jüzdegen myŋ euro nesie alyp, ony qaitarmaǧan degen küdıkke ılındı. Atalǧan kompaniianyŋ artynda käsıpker Dariuş Vilchinski tūrǧany atap ötıldı. Būdan bölek, 2012 jyly Palukas sol käsıpkerdıŋ kompaniiasynan 223 myŋ euroǧa üi satyp alǧan degen derek te jariialandy.
Dauǧa Palukastyŋ äpkesı basqaratyn Dankora kompaniiasy da ılındı. Kompaniia EO-dan 200 myŋ euro kölemınde nesie alyp, Garni kompaniiasynan jabdyq satyp alǧany belgılı boldy.
Jurnalistık zertteu jariialanǧannan keiın Litvadaǧy qyzmettık etika jönındegı komissiia özdıgınen tergeu jūmystaryn bastap kettı. Palukas bastapqyda barlyq aiyptaulardy joqqa şyǧaryp, mūny «saiasi bäsekelesterdıŋ şabuyly» dep ataǧan.
24 şıldede Litva prezidentı Palukastan halyqtyŋ sūraqtaryna jauap berıp, bolaşaǧy turaly oilanyp köru üşın ekı apta demalys aludy sūrady. Palukas būl üzılıstı «aldyn ala josparlanǧan demalys» dep ataǧan bolatyn.
Alaida araǧa ekı apta salyp, ol premerlık qyzmetınen de, partiia töraǧalyǧynan da ketu turaly şeşım qabyldady.
