قازاقستاننىڭ بۇرىنعى يندۋستريا جانە ينفراقۇرىلىمدىق دامۋ ۆيتسە-ءمينيسترى تيمۋر توقتاباەۆتىڭ جازاسى قاتاڭداتىلدى، دەپ حابارلايدى "ادىرنا" ءتىلشىسى استانا سوتىنىڭ ءباسپاسوز قىزمەتىنە سىلتەمە جاساپ.
سوتتالعان بۇرىنعى ۆيتسە-مينيستر تيمۋر توقتاباەۆتىڭ جازاسى قاتاڭداتىلعانى بەلگىلى بولدى.
«ءىس جازانى وتەيتىن مەكەمەنى وزگەرتۋدى سۇراعان پروكۋروردىڭ اپەللياتسيالىق شاعىمى، سونداي-اق سوتتالۋشى مەن ونىڭ قورعاۋشىلارىنىڭ ونىڭ كىناسىزدىگى تۋرالى ۋاجدەرىن كەلتىرگەن وتىنىشتەرى نەگىزىندە قارالدى. استانا سوتىنىڭ قىلمىستىق ىستەر جونىندەگى سوت القاسى قىلمىس جاساۋداعى كىناسى دالەلدەنگەندىكتەن ۇكىمنىڭ كۇشىن جويۋعا نەگىز تاپپادى. قىلمىستىق-اتقارۋ جۇيەسى مەكەمەسىندە باس بوستاندىعىنان ايىرۋ جازاسىن وتەۋگە قاتىستى سوت ۇكىمى ەڭ تومەنگى قاۋىپسىزدىكتەن ورتاشا قاۋىپسىزدىككە وزگەرتىلدى. ۇكىم زاڭدى كۇشىنە ەندى» - دەلىنگەن حابارلامادا.
27 قازاندا توقتاباەۆ قىزمەتتىك وكىلەتتىگىن اسىرا پايدالاندى دەگەن كۇدىكپەن ۇستالىپ، مۇلكى تاركىلەنىپ، ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلعان ەدى. ول جەتى جىلعا تۇرمەگە توعىتىلعان. شەنەۋنىكتىڭ ارەكەتىنەن كەيىن مەملەكەتكە 40,6 ميلليارد تەڭگە زيان كەلگەن.
