فوتو: gov.kz
اقتوبە وبلىسىندا بىرنەشە جىل بۇرىن بولعان قايعىلى وقيعا قوعامدا ءالى دە شەشىمىن تاپپاي كەلە جاتقان ماسەلەنى قايتا كۇن تارتىبىنە شىعاردى. قاڭعىباس يتتەردىڭ شابۋىلىنان 13 جاستاعى بالا كوز جۇمدى. بالانىڭ اكەسى وتاربەك ءابشانوۆ وقيعانىڭ قالاي بولعانىن ايتىپ، جاۋاپكەرشىلىك ماسەلەسىن كوتەردى.
«بالام ويىنعا شىعىپ كەتكەن…»
وتاربەك ءابشانوۆتىڭ ايتۋىنشا، قايعىلى كۇن ادەتتەگىدەي باستالعان. ول جۇمىستا بولعان كەزدە بالاسى سىرتقا ويناۋعا شىققان.
«وقيعا بولعان كۇنى مەن جۇمىستا بولدىم. بالام ويىنعا شىعىپ كەتكەن. ءبىر كەزدە مەكتەپتەن WhatsApp ارقىلى حابارلاما كەلدى. بالالارعا ەسكەرتۋ جاساپ جاتىر ەكەن، ءبىر بالاعا يتتەر شابۋىل جاساعانى تۋرالى حابارلاما بولدى. سول كەزدە ءمان بەرمەدىم…»، - دەيدى ول.
الايدا كوپ ۇزاماي جاعدايدىڭ اۋىر ەكەنى بەلگىلى بولادى.
«كەيىن پوليتسيا كەلدى. بىزگە ۆيدەونى كورسەتتى. سول كەزدە عانا ءبارىن تۇسىندىك»، - دەپ ايتتى اقتوبەلىك تۇرعىن.
اكەنىڭ سوزىنشە، وقيعا قالاداعى ىقشاماۋدانداردىڭ بىرىندە بولعان. بالاسىنا شابۋىل جاساعان يتتەردىڭ ارەكەتى بەلگىلى ءبىر سەبەپپەن باستالعان بولۋى مۇمكىن.
«ۆيدەودا الدىمەن ءبىر قارا يت بولعان. ايتۋىنشا، ول جاڭا كۇشىكتەگەن يت ەكەن. كۇشىكتەرىن قىزعانىپ، الدىمەن سول شابۋىل جاساعان سياقتى»، - دەدى ول.
وقيعا بارىسىندا جاعداي ۋشىعىپ كەتكەن.
«باسىندا ءبىر يت بولسا، كەيىن وعان تاعى 3-4 يت قوسىلىپ، توپ بولىپ كەتكەن. سول كەزدە بالام قاشىپ قۇتىلا الماي قالعان»، - دەپ ءتۇسىندىردى اقتوبەلىك تۇرعىن وقيعانى.
وقيعا بىرنەشە سەكۋندتىڭ ىشىندە قايعىلى اياقتالعان.
«يتتەر جينالىپ، تالاپ تاستاعان. سول جەردە اۋىر جاراقات الىپ، جان تاپسىردى»، - دەپ قايعىلى كۇندى ەسىنە الدى.
وتاربەك ءابشانوۆ مۇنداي وقيعالار ءالى دە جالعاسىپ جاتقانىن ايتادى.
«مەنىڭ بالامنان كەيىن دە وسىنداي جاعدايلاردى ەستىپ ءجۇرمىن. ءبىر ەر ادام بالاسىن كوتەرىپ تۇرعان كەزدە يتتەر شابۋىل جاساعان. تاعى ءبىر 7 جاسار بالاعا شابۋىل بولعان. ءبىر قىز بالا يتتەرگە تالانعاننان كەيىن پسيحولوگيالىق سوققى الىپ، ەشكىممەن سويلەسپەي قالعان»، - دەپ كورگەن-ەستىگەن وقيعالارىن ءبولىستى وتاربەك ءابشانوۆ.
ونىڭ ايتۋىنشا، بۇل – جۇيەلى پروبلەما. ماسەلەنىڭ ءتۇپ-توركىنى – باقىلاۋدىڭ السىزدىگى مەن جاۋاپكەرشىلىكتىڭ جوقتىعىندا.
«مەن ناقتى نە ىستەۋ كەرەك ەكەنىن بىلمەيمىن. بىراق ادام قاۋىپسىزدىگى ءبىرىنشى ورىندا بولۋى كەرەك. ەڭ باستى قۇندىلىق – ادامنىڭ ءومىرى مەن دەنساۋلىعى»، - دەدى ول.
سونداي-اق ول ءۇي جانۋارلارىن اسىراۋشىلارعا تالاپتى كۇشەيتۋ قاجەت ەكەنىن اتاپ ءوتتى.
«ەگەر بىرەۋ يت ۇستاسا، وعان تولىق جاۋاپ بەرۋى كەرەك. جاي عانا اسىراپ، كەيىن قاراۋسىز قالدىرۋعا بولمايدى. ەگەر ول اينالاعا قاۋىپ توندىرسە، بۇل دۇرىس ەمەس»، - دەيدى وتانداسىمىز.
اقتوبەدەگى احۋال: وزگەرىس بار ما؟
ءابشانوۆتىڭ ايتۋىنشا، وڭىردە قاڭعىباس يتتەر ماسەلەسى بۇرىننان بار.
«مەن بۇل پروبلەمانى بۇرىننان سەزەتىنمىن. ءبىر كۇنى ۇلكەن جاعداي بولادى دەپ ويلايتىنمىن. يتتەر توپتاسىپ جۇرەدى، بىراق ناقتى باقىلاۋ جوق»، - دەدى ول.
قازىرگى جاعدايعا قاتىستى دا تۇبەگەيلى وزگەرىس بايقالمايدى.
«قازىر دە تولىق شەشىلدى دەپ ايتا المايمىن. ءالى دە ادامدار زارداپ شەگىپ جاتىر»، - دەيدى كەيىپكەرىمىز.
ايتا كەتەيىك، قازىر قازاقستاندا جانۋارلارعا جاۋاپكەرشىلىكپەن قاراۋ ماسەلەسى قايتا تالقىلانىپ جاتىر. ماجىلىستە بۇرالقى يتتەردى رەتتەۋ، سونىڭ ىشىندە يەسىز جانۋارلاردى ۋاقىتشا وقشاۋلاۋ جانە قاجەت بولعان جاعدايدا ەۆتانازيا قولدانۋ تۋرالى ۇسىنىستار ايتىلدى
