الماتى قالاسىنداعى ساياباقتاردىڭ بىرىندە ورنالاسقان اتتراكتسيوندا كامەلەتكە تولماعان قىز جابىق باس-سۇيەك مي جاراقاتىن (جبسمج) العان. بۇل تۋرالى زارداپ شەككەن قىزدىڭ اناسى مادينا اسكەنوۆا مالىمدەدى، دەپ حابارلايدى “ادىرنا”.
اناسىنىڭ ايتۋىنشا، قىزىنىڭ جاعدايى ءالى دە اۋىر.
“الماتىداعى ساياباقتاردىڭ بىرىندە ورنالاسقان “ۆالس” اتتراكتسيونىندا كامەلەتكە تولماعان قىزىم جابىق باس-سۇيەك مي جاراقاتىن الدى. ناتيجەسىندە ول ەكى كۇردەلى وتادان ءوتتى، ۇزاق مەرزىمدى وڭالتۋدان ءوتىپ جاتىر، قاتتى اۋىرسىنۋدان، فيزيكالىق زارداپتاردان جانە اۋىر پسيحولوگيالىق جاراقاتتان زارداپ شەگۋدە”، – دەپ جازدى ايەل Facebook پاراقشاسىندا.
اسكەنوۆانىڭ ايتۋىنشا، بۇل وقيعا ساياباق اكىمشىلىگىنىڭ نەمقۇرايلىعى سالدارىنان بولعان.
“مەندە اتتراكتسيوندا قاۋىپسىزدىك تەحنيكاسىنىڭ ساقتالماعانى تۋرالى بەينەايعاقتار بار. اتتراكتسيون اقاۋلى بولعانىنا قاراماستان، ونى قولدانۋدى جالعاستىرعان. قىزمەتكەرلەر قايعىلى وقيعانىڭ الدىن الۋ ءۇشىن قاجەتتى شارالاردى قابىلداماعان،” – دەدى ول.
ونىڭ ايتۋىنشا، وقيعادان كەيىن ساياباق قالىپتى رەجيمدە جۇمىسىن جالعاستىرعان. "ۆالس" اتتراكتسيونى توقتاتىلماعان، تەكسەرۋ جۇرگىزىلمەگەن، جاۋاپتى تۇلعالار جاۋاپكەرشىلىككە تارتىلماعان. اناسىنىڭ پىكىرىنشە، بۇل باسقا كەلۋشىلەردىڭ، سونىڭ ىشىندە بالالاردىڭ دا قاۋىپسىزدىگىنە قاتەر توندىرەدى.
“پوليتسيا باسقارماسى بۇل دەرەك بويىنشا قىلمىستىق ءىس قوزعالعانىن راستادى.
اتالعان دەرەك بويىنشا قر قك 306-بابى 2-بولىگى (قاۋىپتىلىگى جوعارى نىسانداردى پايدالانۋ كەزىندەگى قاۋىپسىزدىك تالاپتارىن بۇزۋ) بويىنشا قىلمىستىق قۇقىقبۇزۋشىلىق بەلگىلەرىمەن تەرگەۋ امالدارى جۇرگىزىلىپ جاتىر. ءتيىستى ساراپتامالار تاعايىندالدى. تەرگەۋ شارالارىنىڭ ناتيجەلەرى بويىنشا پروتسەسسۋالدىق شەشىم قابىلدانادى”، – دەپ حابارلادى الماتى پوليتسياسى.
زارداپ شەككەن بالانىڭ اتا-اناسى ادىلدىك تالاپ ەتىپ، تەرگەۋدىڭ وبەكتيۆتى جۇرگىزىلۋىنە جانە قوعامدىق ورىندارداعى اتتراكتسيونداردىڭ قاۋىپسىزدىگىنە باقىلاۋدىڭ كۇشەيتىلۋىنە ءۇمىت ارتىپ وتىر.
