قاراعاندى وبلىسىنداعى اقجال كەنتىندە «جۇمىسشى ماماندىقتار جىلى» مەن مەتاللۋرگتەر كۇنىنە وراي «نوۆا تسينك» جشس قىزمەتكەرلەرىنە العىس حاتتار مەن ەستەلىك سىيلىقتار تابىس ەتىلدى. سونداي-اق شارا اياسىندا «كوكبورى كەرنەي بابا» قوعامدىق قايىرىمدىلىق قورى اقشاتاۋ اۋىلدىق فەلدشەرلىك-اكۋشەرلىك پۋنكتىنە جەدەل جاردەم كولىگىن، ال اقجال اۋىلىنىڭ تۇرعىنى تۇرسىن قاپپاسوۆاعا پاتەر كىلتىن سىيعا تارتتى، دەپ حابارلايدى «ادىرنا» ءتىلشىسى.
مەملەكەت باسشىسى قاسىم-جومارت توقاەۆتىڭ جارلىعىمەن 2025 جىل «جۇمىسشى ماماندىقتار جىلى» دەپ جاريالاندى. بۇل – ادال ەڭبەگىمەن ەل دامۋىنا ۇلەس قوسىپ جۇرگەن ازاماتتاردىڭ مارتەبەسىن ارتتىرۋعا باعىتتالعان ماڭىزدى قادام. ءوز ىسىنە ادال كەز كەلگەن ادامنىڭ قوعامدا ءوز ورنى مەن قۇرمەتى بار. ءاربىر ەڭبەكتىڭ ەلەنىپ، باعالانۋى وزگەلەرگە شابىت بەرەدى»،—دەدى شەت اۋدانىنىڭ اكىمى مۇحيت مۇحتاروۆ شارانىڭ اشىلۋىندا.
سالتاناتتى راسىمدە «نوۆا تسينك» جشس قىزمەتكەرلەرى باتىربەك قوسانوۆ، ايگۇل مياشەۆا، سانسىزباي وتەباەۆ، قۇمارحان حابيدان، عاريفوللا جاحمەتبەكوۆ، ساعي قاسىموۆ جانە ايبەك سەرىكۇلى العىس حاتتارمەن جانە سىيلىقتارمەن ماراپاتتالدى. سونىمەن بىرگە اۋدان اكىمى كومپانيا باسشىلىعىنا ءوڭىر تۇرعىندارىن جۇمىسپەن قامتىپ وتىرعانى ءۇشىن ريزاشىلىعىن ءبىلدىردى.
شارا اياسىندا «كوكبورى كەرنەي بابا» قورىنىڭ ۇيىمداستىرۋىمەن ۇلتتىق سپورت تۇرلەرىنەن جارىستار ءوتتى. قازاقشا كۇرەس، ساداق اتۋ، الامان بايگە، توق بايگە جانە قۇنان بايگەگە ەلىمىزدىڭ بارلىق وڭىرلەرىنەن كەلگەن سپورتشىلار قاتىستى.
ساداق اتۋدان 15 وڭىردەن 135 مەرگەن باق سىنادى. ەڭ كوپ ۇپايدى باتىس قازاقستان وبلىسىنان كەلگەن مۇرات لۇقپانوۆ جينادى. ول 1-ورىن الىپ، 1 ميلليون تەڭگە اقشالاي سىيلىقپەن ماراپاتتالدى.
قازاقشا كۇرەستەن 82 كەلى سالماقتا ءبىرىنشى ورىندى تارازدىق بەكادىل شايمەردەنوۆ جەڭىپ الىپ، اۆتوكولىككە يە بولدى. ابسوليۋت سالماقتا شىمكەنتتىك ەرسۇلتان مۇزاپاروۆ جەڭىسكە جەتىپ، ول دا اۆتوكولىكپەن ماراپاتتالدى.
الامان بايگەدە قاراعاندىنىڭ “باقتورى” اتتى تۇلپارى جەڭىسكە جەتىپ، شاباندوزى – شەت اۋدانىنان تۇرعىنى ماقسات جاندوس. توق بايگەدە باتىس قازاقستاننان كەلگەن حانكۇرەن اتتى سايگۇلىك (شاباندوزى – ماديار ابزال),قۇنان بايگەدە – شەت اۋدانىنىڭ شالقۇيرىق جىلقىسى (شاباندوزى – نۇرجىگىت قابىلديەۆ) توپ جاردى. بارلىق جەڭىمپازعا اۆتوكولىك بەرىلدى.
سونىمەن قاتار قوشقار كوتەرۋ سايىسىندا ارىس قالاسىنان كەلگەن ازامات جولىمبەتوۆ ۇزدىك دەپ تانىلدى.
«كوكبورى كەرنەي بابا» قورى اۋىل جاستارىن قولداپ، اۋىل تۇرعىندارىنىڭ الەۋمەتتىك جاعدايىن جاقسارتۋعا باعىتتالعان ءتۇرلى جوبالاردى جۇزەگە اسىرىپ كەلەدى.
