Qaraǧandy oblysyndaǧy Aqjal kentınde «Jūmysşy mamandyqtar jyly» men metallurgter künıne orai «Nova Sink» JŞS qyzmetkerlerıne alǧys hattar men estelık syilyqtar tabys etıldı. Sondai-aq şara aiasynda «Kökbörı Kernei baba» qoǧamdyq qaiyrymdylyq qory Aqşatau auyldyq feldşerlık-akuşerlık punktıne jedel järdem kölıgın, al Aqjal auylynyŋ tūrǧyny Tūrsyn Qappasovaǧa päter kıltın syiǧa tartty, dep habarlaidy «Adyrna» tılşısı.
Memleket basşysy Qasym-Jomart Toqaevtyŋ jarlyǧymen 2025 jyl «Jūmysşy mamandyqtar jyly» dep jariialandy. Būl – adal eŋbegımen el damuyna üles qosyp jürgen azamattardyŋ märtebesın arttyruǧa baǧyttalǧan maŋyzdy qadam. Öz ısıne adal kez kelgen adamnyŋ qoǧamda öz orny men qūrmetı bar. Ärbır eŋbektıŋ elenıp, baǧalanuy özgelerge şabyt beredı»,—dedı Şet audanynyŋ äkımı Mūhit Mūhtarov şaranyŋ aşyluynda.
Saltanatty räsımde «Nova Sink» JŞS qyzmetkerlerı Batyrbek Qosanov, Aigül Miiaşeva, Sansyzbai Ötebaev, Qūmarhan Habidan, Ǧarifolla Jahmetbekov, Saǧi Qasymov jäne Aibek Serıkūly alǧys hattarmen jäne syilyqtarmen marapattaldy. Sonymen bırge audan äkımı kompaniia basşylyǧyna öŋır tūrǧyndaryn jūmyspen qamtyp otyrǧany üşın rizaşylyǧyn bıldırdı.
Şara aiasynda «Kökbörı Kernei baba» qorynyŋ ūiymdastyruymen ūlttyq sport türlerınen jarystar öttı. Qazaqşa küres, sadaq atu, alaman bäige, toq bäige jäne qūnan bäigege elımızdıŋ barlyq öŋırlerınen kelgen sportşylar qatysty.
Sadaq atudan 15 öŋırden 135 mergen baq synady. Eŋ köp ūpaidy Batys Qazaqstan oblysynan kelgen Mūrat Lūqpanov jinady. Ol 1-oryn alyp, 1 million teŋge aqşalai syilyqpen marapattaldy.
Qazaqşa küresten 82 kelı salmaqta bırınşı oryndy tarazdyq Bekädıl Şaimerdenov jeŋıp alyp, avtokölıkke ie boldy. Absoliut salmaqta şymkenttık Ersūltan Mūzaparov jeŋıske jetıp, ol da avtokölıkpen marapattaldy.
Alaman bäigede Qaraǧandynyŋ “Baqtory” atty tūlpary jeŋıske jetıp, şabandozy – Şet audanynan tūrǧyny Maqsat Jandos. Toq bäigede Batys Qazaqstannan kelgen Hanküren atty säigülık (şabandozy – Madiiar Abzal),qūnan bäigede – Şet audanynyŋ Şalqūiryq jylqysy (şabandozy – Nūrjıgıt Qabyldiev) top jardy. Barlyq jeŋımpazǧa avtokölık berıldı.
Sonymen qatar qoşqar köteru saiysynda Arys qalasynan kelgen Azamat Jolymbetov üzdık dep tanyldy.
«Kökbörı Kernei baba» qory auyl jastaryn qoldap, auyl tūrǧyndarynyŋ äleumettık jaǧdaiyn jaqsartuǧa baǧyttalǧan türlı jobalardy jüzege asyryp keledı.
