25 شىلدە كۇنى الماتى وبلىسىندا جوعالىپ كەتكەن EC-145 اسكەري تىكۇشاعى ەكيپاجى مۇشەلەرىنىڭ تۋىستارى پرەزيدەنتتەن، توتەنشە جاعداي جانە قورعانىس مينيسترلەرىنەن ىزدەۋ وپەراتسياسىن جەكە باقىلاۋلارىنا الۋدى سۇرادى، دەپ حابارلايدى “ادىرنا” ۇلتتىق پورتالى Syrmedia سايتىنا سىلتەمە جاساپ.
“جاعدايعا نازار اۋدارۋىڭىزدى سۇرايمىز. ەكيپاج مۇشەلەرىن تۋىستارى كۇتىپ وتىر. ولاردى تەزىرەك قۇتقارادى دەپ ۇمىتتەنەمىز” دەيدى تۋىستارى.
ولاردىڭ سوزىنشە، ءبىرىنشى كۇن وتار اۋدانىندا ىزدەۋ جۇمىستارى جۇرگىزىلىپ، “بوستان-بوسقا ۋاقىت” جۇمسالعان. ناعىز ىزدەۋ ءبىر كۇننەن كەيىن عانا – سوربۇلاق قويماسى ماڭىندا باستالعان.
“بالكىم، ولار جاراقاتتانىپ، ءالى كۇنگە دەيىن كومەكتى كۇتىپ جاتقان بولار. قازىر ءبىز دوستارى، تۋىستارى مەن ەرىكتىلەر ءوز كۇشىمىزبەن ىزدەپ جاتىرمىز. ىزدەۋ جۇمىسىن كۇشەيتىپ، تۇندە تەحنيكانى قوسۋدى سۇرايمىز. ءاربىر مينۋت قىمبات” - دەيدى تۋىستارى.
اقپراتقا سۇيەنسەك، ەكيپاج مۇشەلەرىنىڭ اتى-جوندەرى مىنانداي: امان امانگەلدى، باقتيار ەرجىگىتوۆ جانە نۇرجىگىت ۇيسىنباەۆ.
ەسكە سالا كەتەيىك، EC-145 تىكۇشاعى 25 شىلدەدە راداردان جوعالىپ كەتكەن ەدى. تىكۇشاق لۋگوۆويدان ۇشىپ شىققان. وتار اۋماعىندا ونىمەن بايلانىس ۇزىلگەن. بۇعان دەيىن توتەنشە جاعداي مينيسترلىگى اسكەري تىكۇشاقتىڭ بولشەكتەرى سوربۇلاقتان تابىلعانىن حابارلاعان بولاتىن.
