استانا قالاسىنداعى نازارباەۆ زياتكەرلىك مەكتەبىنىڭ وقۋشىسى فاريزا فازىل امەريكالىق The New York Times باسىلىمى جاريالاعان Open Letter Contest حالىقارالىق ەسسە بايقاۋىندا الەم بويىنشا ۇزدىك 10 اۆتوردىڭ قاتارىنا ەندى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
فاريزا فازىل بايقاۋعا قازاقتارداعى قىز بالاعا ات قويۋ ءداستۇرى تۋرالى ەسسە ۇسىنعان. ول جازباسىندا "ۇلتۋعان" ەسىمدى قىزدارعا ءۇن قاتىپ، ۇل بالانى اڭساپ دۇنيەگە كەلگەن قىزدارعا تاعىلعان ەسىمدەردىڭ ارتىنداعى الەۋمەتتىك جانە پسيحولوگيالىق ءماندى قوزعايدى.
"ولار سەنى سولاي اتادى. سەنى العاش قۇشاقتاعان كەزدە سونى اڭسادى. سەنى ەمەس. باسقانى. جانە ءبارىبىر سەن قالدىڭ. سەن ولاردىڭ كوڭىلىن قالدىرعان اۋىرتپالىقتى ءۇنسىز مەيىرىممەن كوتەرۋدى ۇيرەندىڭ..." — دەپ جازدى جاس اۆتور.
Batyrjamal ينستاگرام پاراقشاسىندا جاريالانعان سۇحباتىندا فاريزا بۇل تاقىرىپتى تاڭداۋعا وتباسى، تاريح جانە قوعامدا كەڭ تارالعان گەندەرلىك كوزقاراستار سەبەپ بولعانىن اتاپ ءوتتى.
"باۋىرجان مومىشۇلىنىڭ اجەسىنىڭ ەسىمى قىزتۋماس بولعانىن ەستىدىم. مۇنداي ەسىمدەر وتباسىنىڭ ۇل بالاعا دەگەن ءۇمىتىن بىلدىرەدى. ەگەر مەندە سونداي ات بولسا، ونى وزگەرتەر ەدىم. بۇل مەنى ويلاندىردى، ءارى وسى تاقىرىپتى تاڭداۋعا تۇرتكى بولدى", — دەدى وقۋشى.
