Astana qalasyndaǧy Nazarbaev ziiatkerlık mektebınıŋ oquşysy Fariza Fazyl amerikalyq The New York Times basylymy jariialaǧan Open Letter Contest halyqaralyq esse baiqauynda älem boiynşa üzdık 10 avtordyŋ qataryna endı, dep habarlaidy "Adyrna" ūlttyq portaly Azattyq radiosyna sıltep.
Fariza Fazyl baiqauǧa qazaqtardaǧy qyz balaǧa at qoiu dästürı turaly esse ūsynǧan. Ol jazbasynda "Ūltuǧan" esımdı qyzdarǧa ün qatyp, ūl balany aŋsap düniege kelgen qyzdarǧa taǧylǧan esımderdıŋ artyndaǧy äleumettık jäne psihologiialyq mändı qozǧaidy.
"Olar senı solai atady. Senı alǧaş qūşaqtaǧan kezde sony aŋsady. Senı emes. Basqany. Jäne bärıbır sen qaldyŋ. Sen olardyŋ köŋılın qaldyrǧan auyrtpalyqty ünsız meiırımmen köterudı üirendıŋ..." — dep jazdy jas avtor.
Batyrjamal instagram paraqşasynda jariialanǧan sūhbatynda Fariza būl taqyrypty taŋdauǧa otbasy, tarih jäne qoǧamda keŋ taralǧan genderlık közqarastar sebep bolǧanyn atap öttı.
"Bauyrjan Momyşūlynyŋ äjesınıŋ esımı Qyztumas bolǧanyn estıdım. Mūndai esımder otbasynyŋ ūl balaǧa degen ümıtın bıldıredı. Eger mende sondai at bolsa, ony özgerter edım. Būl menı oilandyrdy, ärı osy taqyrypty taŋdauǧa türtkı boldy", — dedı oquşy.
