جۋرناليست ءاليا ءاشىم قوعامنان كەشىرىم سۇرادى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدە تاراعان بەينەماتەريالدا تانىمال جۋرناليست ءارى دەرەكتى فيلم اۆتورى ءاليا ءاشىم اباي قۇنانبايۇلى مەن ونىڭ جارى ءدىلدانىڭ تۇرعان ءۇيىن كورسەتىپ ءجۇرىپ، “اباي مەن ءدىلدا نەتكەن بولمە” دەپ ءازىل ايتقان.
ءاليا ءاشىم ءوزىنىڭ Facebook پاراقشاسىندا رەسمي كەشىرىم سۇراپ، ءمان-جايدى تۇسىندىرەتىن جازبا جاريالادى.
“سىزدەر — مەنىڭ رۋحاني ۇستازدارىم، اعا-اپكەلەرىم، حالقىم. وزدەرىڭىزدەن «ابايدى قورلاعان قىز» دەگەن اتاۋمەن تانىلۋ مەن ءۇشىن اۋىر ءارى ويلاماعان جاعداي بولدى. وسىعان بايلانىستى شىن جۇرەكتەن كەشىرىم سۇرايمىن،” — دەدى جۋرناليست.
ول قارقارالىداعى ۆيدەوداعى سوزىنە بايلانىستى اكەسىنىڭ دە رەنجىگەنىن ايتىپ، ۆيدەونى ورىنسىز بولعانىن مويىندادى. سونىمەن قاتار، وعان قاتىستى ايتىلعان “قارالىم ءۇشىن ىستەدى”، “قارجىلاندىرىلعان جوبا” دەگەن پىكىرلەرمەن كەلىسپەيتىنىن جەتكىزدى.
“مەنىڭ ماقساتىم — ەشقاشان ابايدى نەمەسە قازاقتىڭ مادەنيەتىن مازاق ەتۋ ەمەس. كەرىسىنشە، تاريحي سانانى جاڭعىرتۋ، جاستاردىڭ ۇلتتىق رۋحىن كوتەرۋ جولىندا ەڭبەك ەتىپ جۇرگەن اداممىن،” — دەپ جازدى ول.
ءاليا ءاشىم ءوز كومانداسىمەن بىرگە وسى ۋاقىتقا دەيىن ەشقانداي سىرتقى نە ۇكىمەتتىك قارجىلاندىرۋسىز “قوناەۆ ءداۋىرى”، ء“بىز نەگە ورىسشا سويلەيمىز؟”، “جەلتوقسان” سەكىلدى تاريحي-تانىمدىق دەرەكتى فيلمدەر تۇسىرگەنىن، سونداي-اق ەل ىشىندەگى دەرەكتەردى جيناۋ ماقساتىندا “جەلتوقسان وقيعاسىنا” قاتىسقان 40-تان استام ازاماتپەن سۇقبات جازىلعانىن اتاپ ءوتتى.
“TikTok, Instagram سەكىلدى پلاتفورمالاردا وسى تاريحي تاقىرىپتاردى جاستارعا قىزىقتى فورماتتا جەتكىزۋگە تىرىسامىز. سول سەبەپتى كەيبىر ستيلدەر ەركىن بولۋى مۇمكىن. بىراق بۇل — ۇلتتىق قۇندىلىقتاردى قۇرمەتتەمەۋ دەگەن ءسوز ەمەس،” — دەدى ول.
جۋرناليست جەلىدە داۋ تۋعىزعان ۆيدەوداعى “قۇيرىق-باۋىر تۋرالى اقپارات” ناقتى “سالت-ءداستۇر سويلەيدى” كىتابىنان الىنعانىن جانە ۆيدەو استىندا سىلتەمە دە بولعانىن ايتتى. سونىمەن قاتار، تالعات رىسقۇلبەكوۆپەن تۇسىرىلگەن فوتو بولاشاق جوباعا سۇقبات بارىسىندا جاسالعانىن ناقتىلادى.
جازبا سوڭىندا ول قوعامدى نەگىزسىز ايىپتاۋعا ەمەس، جاناشىر سىن مەن ورتاق قۇندىلىقتاردى ساقتاۋ جولىندا بىرگە ارەكەت ەتۋگە شاقىردى.
"نيەتىمدى جەتكىزە الدىم دەپ سەنەمىن. قولداۋلارىڭىز بەن ورىندى سىندارىڭىز ءۇشىن العىس ايتامىن،” - دەپ قورىتىندىلادى ءاليا ءاشىم.
