Jurnalist Äliia Äşım qoǧamnan keşırım sūrady, dep habarlaidy "Adyrna" ūlttyq portaly.
Äleumettık jelıde taraǧan beinematerialda tanymal jurnalist ärı derektı film avtory Äliia Äşım Abai Qūnanbaiūly men onyŋ jary Dıldänıŋ tūrǧan üiın körsetıp jürıp, “Abai men Dıldä netken bölme” dep äzıl aitqan.
Äliia Äşım özınıŋ Facebook paraqşasynda resmi keşırım sūrap, män-jaidy tüsındıretın jazba jariialady.
“Sızder — menıŋ ruhani ūstazdarym, aǧa-äpkelerım, halqym. Özderıŋızden «Abaidy qorlaǧan qyz» degen ataumen tanylu men üşın auyr ärı oilamaǧan jaǧdai boldy. Osyǧan bailanysty şyn jürekten keşırım sūraimyn,” — dedı jurnalist.
Ol Qarqaralydaǧy videodaǧy sözıne bailanysty äkesınıŋ de renjıgenın aityp, videony orynsyz bolǧanyn moiyndady. Sonymen qatar, oǧan qatysty aitylǧan “qaralym üşın ıstedı”, “qarjylandyrylǧan joba” degen pıkırlermen kelıspeitının jetkızdı.
“Menıŋ maqsatym — eşqaşan Abaidy nemese qazaqtyŋ mädenietın mazaq etu emes. Kerısınşe, tarihi sanany jaŋǧyrtu, jastardyŋ ūlttyq ruhyn köteru jolynda eŋbek etıp jürgen adammyn,” — dep jazdy ol.
Äliia Äşım öz komandasymen bırge osy uaqytqa deiın eşqandai syrtqy ne ükımettık qarjylandyrusyz “Qonaev däuırı”, “Bız nege orysşa söileimız?”, “Jeltoqsan” sekıldı tarihi-tanymdyq derektı filmder tüsırgenın, sondai-aq el ışındegı derekterdı jinau maqsatynda “Jeltoqsan oqiǧasyna” qatysqan 40-tan astam azamatpen sūqbat jazylǧanyn atap öttı.
“TikTok, Instagram sekıldı platformalarda osy tarihi taqyryptardy jastarǧa qyzyqty formatta jetkızuge tyrysamyz. Sol sebeptı keibır stilder erkın boluy mümkın. Bıraq būl — ūlttyq qūndylyqtardy qūrmettemeu degen söz emes,” — dedı ol.
Jurnalist jelıde dau tuǧyzǧan videodaǧy “qūiryq-bauyr turaly aqparat” naqty “Salt-dästür söileidı” kıtabynan alynǧanyn jäne video astynda sılteme de bolǧanyn aitty. Sonymen qatar, Talǧat Rysqūlbekovpen tüsırılgen foto bolaşaq jobaǧa sūqbat barysynda jasalǧanyn naqtylady.
Jazba soŋynda ol qoǧamdy negızsız aiyptauǧa emes, janaşyr syn men ortaq qūndylyqtardy saqtau jolynda bırge äreket etuge şaqyrdy.
"Nietımdı jetkıze aldym dep senemın. Qoldaularyŋyz ben oryndy syndaryŋyz üşın alǧys aitamyn,” - dep qorytyndylady Äliia Äşım.
