اباي وبلىسىندا شار قالالىق پوليتسيا ءبولىمىنىڭ باستىعى داۋلى ۆيدەودان كەيىن قىزمەتىنەن بوساتىلدى، جەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
الەۋمەتتىك جەلىدە تاراعان ۆيدەودا ەر ادام شار قالاسىنداعى پوليتسيا بولىمشەسىنىڭ كىرەبەرىسىندە پوليتسيا قىزمەتكەرلەرىنە روگاتكامەن وق اتىپ جاتقان ءساتى تۇسىرىلگەن.
جەلى قولدانۋشىلارىنىڭ ايتۋىنشا، روگاتكا ۇستاعان ەر ادام – جەرگىلىكتى پوليتسيا ءبولىمىنىڭ پودپولكوۆنيك شەنىندەگى باستىعى، ول وسىلايشا ءوز قىزمەتكەرلەرىن “تاربيەلەپ جاتىر” دەلىنگەن.
اباي وبلىستىق پوليتسيا دەپارتامەنتى بۇل ۆيدەوداعى ادامنىڭ راسىندا شار قالالىق پوليتسيا ءبولىمىنىڭ باستىعى ەكەنىن راستادى. قىزمەتتىك تەكسەرىس اياقتالعان.
“تارتىپتىك كوميسسيا جۇمىسىنىڭ قورىتىندىسى بويىنشا جارما اۋدانى، شار قالالىق پوليتسيا ءبولىمىنىڭ باستىعى قىزمەتتىك ەتيكا نورمالارىن بۇزعانى ءۇشىن لاۋازىمىنان بوساتىلدى”، – دەلىنگەن دەپارتامەنتتىڭ ءباسپاسوز حابارلاماسىندا.
