ءۇندىستاندا ۇشاق اپاتىنىڭ سەبەبى انىقتالدى، دەپ حابارلايدى "ادىرنا" ۇلتتىق پورتالى.
2025 جىلدىڭ 12 ماۋسىمىندا احمەداباد قالاسىنان لوندونعا باعىت العان Boeing 787-8 Dreamliner ۇشاعى اۋەگە كوتەرىلگەن سوڭ نەبارى 29 سەكۋند وتكەندە اپاتقا ۇشىرادى. اپات سالدارىنان 260 ادام قازا تاۋىپ، تەك ءبىر عانا جولاۋشى ءتىرى قالعانى بەلگىلى بولدى.
ءۇندىستاننىڭ اۋە اپاتتارىن تەرگەۋ بيۋروسى (AAIB) اپات سەبەبىن زەرتتەي كەلە، ەكى قوزعالتقىشقا وتىن بەرۋدىڭ كەنەت توقتاۋى باستى سەبەپ بولعانىن انىقتادى. تەرگەۋ ناتيجەسى بويىنشا، ۇشۋ كەزىندە وتىن جۇيەسىنىڭ اۋىستىرعىشتارى بەلگىسىز سەبەپپەن “RUN” (جۇمىس ىستەۋ) كۇيىنەن “CUTOFF” (توقتاتۋ) كۇيىنە اۋىستىرىلعان. بۇل جانارماي بەرۋدى توقتاتىپ، قوزعالتقىشتار تارتۋ كۇشىنەن ايىرىلعان. ۇشقىشتاردىڭ ءوزارا سۇحباتى جازباعا ءتۇسىپ قالعان.
"نەگە وتىندى اجىراتتىڭ؟" – دەگەن سۇراققا ەكىنشى ۇشقىش "ەشتەڭە ىستەگەن جوقپىن" دەپ جاۋاپ بەرگەن. ولار وتىن بەرۋدى قالپىنا كەلتىرۋگە تىرىسقانمەن، بيىكتىك پەن ۋاقىتتىڭ جەتىسپەۋشىلىگىنەن بۇل مۇمكىن بولماعان.
مامانداردىڭ ايتۋىنشا، بۇل اۋىستىرعىشتار كەزدەيسوق باسىلۋدان قورعالعان. ياعني، ولاردى تەك قاساقانا ارەكەت نە تەحنيكالىق اقاۋ بولعان جاعدايدا عانا وزگەرتۋگە بولادى. سوندىقتان بۇل اپاتتىڭ ناقتى سەبەپتەرى تەرگەۋ ناتيجەسىندە تولىق ايقىندالادى دەپ كۇتىلۋدە.
امان قالعان جالعىز جولاۋشى – 40 جاستاعى ۇلىبريتانيا ازاماتى. ول ۇشاقتىڭ ارتقى جاعىندا، ەسىككە جاقىن جەردە وتىرعان ءارى قاۋىپسىزدىك بەلبەۋىن مىقتاپ بايلاپ العان ەكەن.
