استانادا جولاۋشىلار اۆتوبۋسى جەڭىل اۆتوكولىككە جول بەرمەي، اپاتقا ۇشىرادى. الەۋمەتتىك جەلىدە وقيعا ورنىنان تۇسىرىلگەن ۆيدەو تاراپ جاتىر، دەپ حابارلايدى "ادىرنا".
قالالىق پوليتسيا دەپارتامەنتىنىڭ اقپاراتىنشا، جول اپاتى كەشە، 3 شىلدە كۇنى بولعان.
«قوسشىعۇلۇلى كوشەسىمەن كەلە جاتقان اۆتوبۋستىڭ جۇرگىزۋشىسى سەركەباەۆ كوشەسىمەن قيىلىستا مانەۆردى اياقتاعان Ford اۆتوكولىگىنە جول بەرمەي، ونىمەن سوقتىعىسقان. سالدارىنان اۆتوبۋستىڭ ءۇش جولاۋشىسى اۋرۋحاناعا جەتكىزىلدى»، - دەپ مالىمدەدى پوليتسيا.
وسى فاكتى بويىنشا تەكسەرىس ءجۇرىپ جاتىر.
ەستەرىڭىزگە سالايىق، استانادا 2 ماۋسىم كۇنى جولاۋشىلار اۆتوبۋسى رەسپۋبليكا داڭعىلىمەن كەلە جاتىپ، جول جيەگىندەگى باعانعا سوعىلعان. جول اپاتى سالدارىنان 15 ادام اۋرۋحاناعا تۇسكەن، ونىڭ ىشىندە التاۋى – بالا. اۋىر جاراقات العان سەگىز جاسار قىز بالا ەكى بىردەي اياعىنان ايىرىلدى.
