Мемлекет басшысы Қасым-Жомарт Тоқаевтың төрағалығымен Қазақстан Республикасы Қауіпсіздік кеңесінің кезекті отырысы өтті, деп хабарлайды "Адырна" ұлттық порталы Ақордаға сілтеме жасап.
Отырыста ішкі және сыртқы көші-қон саласындағы негізгі үрдістер қаралды. Жиында премьер-министрдің орынбасары Ермек Көшербаев, ішкі істер министрі, цифрлық даму, инновациялар және аэроғарыш өнеркәсібі министрі, еңбек және халықты әлеуметтік қорғау министрі есеп берді.
Президент көші-қон саясатын жүзеге асыру кезінде геосаяси факторлар мен қауіптерді, демографиялық болжамдарды және халық қозғалысының себептерін ескерудің маңыздылығын атап өтті.
“Мемлекет басшысы заңсыз көші-қонға жол бермеу бойынша бақылауды күшейту және еліміздің адами капиталын арттыруды ынталандыру қажет екенін айтты”, – делінген Ақорда хабарламасында.
Отырыс барысында Қасым-Жомарт Тоқаев көлік саласындағы ахуалды да сынға алды. Президент шекарада жүк тасымалының баяу жүргізілуі, көптеген өткізу бекеттерінің нашар жағдайда екені және ірі инфрақұрылымдық транзиттік жобалардың мерзімінен кешігіп жатқанын атап өтті.
