بۇگىن، 30 ماۋسىمدا ءماجىلىس توراعاسى ەرلان قوشانوۆ سەگىزىنشى سايلانعان قازاقستان پارلامەنتى ءۇشىنشى سەسسياسىنىڭ جابىلۋى جانە پارلامەنتتىك كانيكۋل تۋرالى مالىمدەدى، دەپ حابارلايدى «ادىرنا» ءتىلشىسى.
ول پارلامەنتتىك قىزمەتتە ماڭىزدى شەشىمدەر قابىلدانعانىن جەتكىزدى.
«سەسسيا باستالاردا مەملەكەت باسشىسى ءوز جولداۋىندا العا قويعان باستى مىندەتتەرى ءبىزدىڭ جۇمىسقا سەرپىن بەرىپ، قارقىن قوستى. ۇلتتىق قۇرىلتايدا ايتىلعان ستراتەگيالىق يدەيالار پارلامەنت نازارىن قوعامنىڭ ەڭ وزەكتى ماسەلەلەرىنە اۋداردى. پرەزيدەنتتىڭ سايلاۋالدى باعدارلاماسى اياسىنداعى زاڭنامالىق باستامالاردىڭ ءبارىن دەرلىك دەپۋتاتتىق كورپۋس وسى سەسسيادا ىسكە اسىردى. ءۇشىنشى سەسسيا بارىسىندا پارلامەنت پالاتالارىنىڭ 3 بىرلەسكەن وتىرىسى، سەنات پەن ءماجىلىستىڭ 39 جالپى وتىرىسى ءوتتى. قوس پالاتانىڭ قاراۋىندا 158 زاڭ جوباسى بولدى، ونىڭ ىشىندە 89 زاڭ قابىلداندى. سەسسيا بارىسىندا ءبىز الەۋمەتتىك ساياسات پەن ازاماتتارىمىزدىڭ مۇددەسى مىزعىماس باسىمدىق ەكەنىن ايقىن كورسەتتىك»،—دەدى قوشانوۆ.
ايتۋىنشا، بيىل بازالىق زەينەتاقى 6,5 پروتسەنتكە، ال ساباقتاس زەينەتاقى 8,5 پروتسەنتكە وسكەن. ودان بولەك، الەۋمەتتىك كومەك الاتىنداردىڭ سانى ارتقان.
«قىركۇيەك ايىنان باستاپ ستيپەنديا مولشەرىن تاعى كوتەرۋ جوسپارلانۋدا. كەيىنگى بەس جىلدا ستيپەنديا ەكى ەسە دەرلىك وسكەنىن اتاپ وتكەن ءجون. وعان قوسا، عىلىمي اتاق ءۇشىن دە ۇستەمەاقى قاراستىرىلدى»،—دەپ ءتۇسىندىردى سپيكەر.
ايتا كەتەيىك، سەنات پەن ءماجىلىس دەپۋتاتتارى قىركۇيەككە دەيىن دەمالادى.
