وزبەكستاندا جوعارى وقۋ ورىندارىنا قۇجات قابىلداۋ ناۋقانى ونلاين رەجيمدە اياقتالدى. 5 ماۋسىم مەن 25 ماۋسىم ارالىعىندا مەملەكەتتىك قىزمەتتەر پورتالدارى ارقىلى 732 411 تالاپكەر تىركەلگەن. ەلدىڭ ءبىلىم، عىلىم جانە يننوۆاتسيالار مينيسترلىگى جانىنداعى ءبىلىم مەن بىلىكتىلىكتى باعالاۋ اگەنتتىگىنىڭ مالىمەتىنشە، بۇل — سوڭعى جەتى جىلداعى ەڭ تومەنگى كورسەتكىش، دەپ حابارلايدى «ادىرنا» ءتىلشىسى.
جوعارى جانە كاسىبي وقۋ ورىندارىنا تۇسۋگە نيەتتى تالاپكەرلەردىڭ باسىم بولىگى (644 027 ادام) وقىتۋ ءتىلى رەتىندە وزبەك ءتىلىن تاڭداعان. 71 476 تالاپكەر ورىس تىلىندە، ال 14 959 تالاپكەر قاراقالپاق تىلىندە وقىعىسى كەلەتىندەرىن كورسەتكەن. ال باسقا تىلدەردە وقۋدى قالاعاندار سانى 1 949 ادامدى قۇراعان.
ايتا كەتەيىك، بىلتىر 894 279 تالاپكەر جوو-عا قۇجات تاپسىرعان. بيىلعى كورسەتكىش وتكەن جىلمەن سالىستىرعاندا 18 پايىزعا تومەن بولىپ وتىر.
ال قازاقستاندا جوعارى وقۋ ورىندارىنا ءتۇسۋ ءۇشىن قۇجاتتار قابىلداۋ 20 ماۋسىم مەن 25 تامىز ارالىعىندا جۇزەگە اسىرىلادى.
